De Meza: AVP dispuesto pa forma gobierno cu MEP, pero Mep no kier

ORANJESTAD – Partido AVP ta dispuesto pa forma un gobierno cu partido MEP, pero e partido geel a mustra di no kier. Asina minister demisionario Mike de Meza a bisa den un prome reaccion despues di eleccion durante un conferencia di prensa diahuebs mainta. Hunto cu de Meza, dos otro minister esta Arthur Dowers y Benny Sevinger a reacciona riba e ‘acusacion’ y ‘comentario’ di opositornan, particularmente di partido MEP y POR. “Tin algun punto cu como gobierno nos mester trece padilanti” Dowers a cuminsa na bisa diahuebs mainta.

FLIP FLOP

Dowers a repasa e proceso cu ta tumando lugar di formacion di gobierno, particularmente refiriendo na declaracionnan haci pa contrincantenan politico. A haci mofa di e partidonan en cuestion, unda ta mustra e.o. cu partido MEP kier forma gobierno prome cu tempo, y awor no tin pura mas. Tambe a haci mofa cu e asunto cartera. “Sra Wever Croes ta bisa cu cierto carteranan tin cu keda p'e, despues nos ta mira dos tres dia despues cu e carteranan ey ta dispuesto pa entrega nan na otro partido tambe”, yamando e asunto un ‘sistema di flip flop’ pa loke ta e formacion di gobierno. “Nos a bisa informado ta cu como partido AVP, te partido cu pueblo a demostra mas confiansa den dje, nos ta dispuesto pa combersa cu en todo caso e partido mas grandi di oposicion den e momentonan akinan pa mira cu si ta posibel cu nan por presenta un programa cu nos ta kere cu ta aceptabel cu nos por coopera na dje pa garantisa cu e pueblo aki por tin un gobierno cu ta stabil y mas cu tur cos, cu ta confiabel” Dowers a sigui bisa. A bisa tambe cu no ta dispuesto pa traha cu un partido chikito, refiriendo na entre otro partido POR y RED cu ta e dos partidonan chikito cu a haya asiento tambe. A tira palabra pa partido RED, aunke no a menciona e nomber, pero a referi na e hecho cu no kier drenta den ningun aventura cu partidonan cu ta den cuenta di droga, ni bagamunderia ni den partidonan cu tin duda den nan integridad. RED ta conoci cu ta e partido cu a bin dilanti durante campaña cu nan ta pro pa legalisa cannabis medicinal y recreativo. Durante debatenan riba e tema ey, practicamente tur partido a sostene e posibilidad pa legalisa cannabis medicinal, pero a rechasa legalizacion di cannabis recreacional. “Si MEP kier hinca su mes den e cos ey, nos ta desea nan hopi exito, pero nos no ta den porkeria”.

DE MEZA

De Meza a papia riba e intencion pa forma gobierno cu partido MEP, aunke cu despues di eleccion caba por a tende lidernan di partidonan MEP, POR y RED nan intencion di forma un gobierno hunto, lagando AVP afo. “Mirando e importancia di goberna pais Aruba den un forma sostenibel y stabilidad, nos ta mas cu disponibel pa scucha e partido grandi cu ta MEP, pa nos sinta na mesa y wak si tin seriedad pa yega na un base amplio real di 18 asiento” de Meza a bisa awe mainta. “Aparentemente no tin e interes aki di parti di MEP. Nos a trece hopi cla na Gobernador. Partido AVP no tin hamber pa poder. Nos ta goberna na momento cu nos wordo yama pa goberna” de Meza a finalisa bisando. Si no ta logra, AVP no tin problema pa bay den oposicion y tene un oposicion hopi fuerte.