Polis ta pidi publico pa informacion riba tiroteo fatal na Seroe Largoweg

ORANJESTAD - Bou guia di Ministerio Publico, Cuerpo Policial di Aruba ta investigando morto fatal di Roque Alvin Thijzen, mihor conoci como Roy Thijzen. E persona aki di 52 aña di edad a wordo tira mata den un cas na Seroe Largoweg dia 9 di september ultimo. E investigacion di su morto ta keto bay andando den full speed. Tur posibel leads ta wordo investiga actualmente dor di e team investigativo. Na interes di e investigacion, polis no por duna ningun informacion ainda tocante e resultadonan.

INFORMACION 

Si bo persona ta dispone di informacion cu lo por ta di importancia pa soluciona e caso aki, ta pidi bo pa por favor tuma contacto urgentemente cu polis. Entre otro, polis lo kier sa cu ken e victima tabatin contacto den e ultimo dianan prome cu su morto. Particularmente den e anochi y madruga prome cu ela wordo tira. Tambe Polis lo kier haya informacion tocante ki sorto di contacto esey tabata.