Oduber: Mester forma gobierno mas liher cu ta posibel

ORANJESTAD – Partido POR kier pa keda cla mas liher cu ta posibel cu e formacion, pa dia 28 di October tin un gobierno nobo caba. Esey tabata e mensahe principal cu lider di partido Otmar Oduber a bin cune durante e reunion cu informador diaranzon merdia. Den un combersacion cu NoticiaCla despues, Oduber a bisa cu e urgencia cu tin pa forma un gobierno nobo, ta pa por cuminsa traha mesora y asina ataca e problema financiero dentro di 2 luna di tempo. Asina ta cumpli cu e norma di e ley di laft, pa entrega tanto un presupuesto supletorio y uno di 2018 prome cu 15 di december ainda.

COOPERACION

Loke pa Oduber a resalta di e reunion di awe, ta e hecho cu gobierno actual no ta cooperando cu dunamento di informacion, de hecho strobando e proceso cu ta pone cu ta duna mas urgencia pa sinta mas liher como gobierno pa atende e situacion actual. E ta basa su mes riba e hecho cu contrario na peticion haci dialuna pa haya informacion necesario di gobierno, esaki no a cumpli. Por lo menos no completo y a keda mas bien hopi ‘sumier’ cu e informacion. E loke a wordo ricibi, ta mustra caba kico e situacion ta loke ta spera nan, y cu pesey nan mester sinta mas lihe cu ta posibel pa resolve e problemanan cu ta spera nan. A manda un carta aparte pa informador cu ta pidi pa keda cla cu e proceso pa fin di e luna aki caba. Informador mester entrega su rapport pa diabierna proximo.