AVP: Coalicion MEP/POR lo nifica instabilidad y intrankilidad

ORANJESTAD – Un coalicion di MEP y POR lo lo nifica instabilidad y intrankilidad pa pais Aruba. Esaki ta e mensahe cu partido AVP a duna informador Arie Swaen durante nan bishita diamars merdia. Tabata actual ministernan Benny Sevinger, Mike de Meza y Arthur Dowers cu a reuni cu Swaen riba e proceso pa forma un Gobierno nobo. Na e ocasion aki, e delegacion di AVP a contesta un cantidad di pregunta cu informador a haci na nan. For di e reunion akinan e delegacion di AVP a conclui cu informador su tarea ta pa forma un Gobierno MEP, POR y posiblemente incluyendo RED.

FORMACION

Segun AVP, un Gobierno di MEP- POR - RED ta locual e partidonan en cuestion ta considera como un Gobierno di base amplio. Mientras cu exclusion di RED lo ta un Gobierno cu un mayoria preta. E delegacion di AVP a trece un cantidad grandi di informacion na informador cual no por wordo divulga publicamente. E mensahe di e delegacion na informador ta, cu un Gobierno di MEP y POR lo ta uno sumamente instabil y cu lo conduci na hopi intrankilidad aki na Aruba y den Reino pa motibo di e forma cu nan kier goberna y pa motibo di nan prioridadnan. Fuera di esaki e delegacion di AVP a indica di nunca partido AVP lo core pa asumi responsabilidad gubernamental si esaki ta pa sirbi interes general di Aruba. Den caso di un gobernacion cu AVP e prioridadnan cu AVP a presenta den eleccion lo mester forma parti di un acuerdo di gobernacion. Esaki kiermen cu no lo por bay castiga comunidad cu medidanan bou capa di raportnan internacional, manera cu MEP y POR ya a indica di kier bay haci.

PLAN

Pa ilustra e compromiso di AVP pa ehecuta e programa cu a bay eleccion cu ne, e delegacion a duna informador copia di e plan di partido AVP “Padilanti”. E plan aki ta contene e puntonan cu lo mester inclui den un acuerdo di gobernacion. Segun AVP, mirando e mayoria marginal cu e gobierno MEP-POR lo tin, e falta total di legitimidad den voto di e lidernan di MEP y POR, e falta di un meta comun otro cu simplemente poder, ta haci cu e gobierno aki lo no tin e autoridad moral y politico necesario den comunidad pa por goberna cu efectividad. Esaki unicamente lo bira peor mirando e intencion di e gobierno MEP-POR pa bay impone medida riba pueblo bou e pretexto di raportnan internacional. “AVP lo no acepta esaki ni un dia y a informa Informador di esaki tambe. E gobierno di MEP-POR lo ta uno di instabilidad y intrankilidad pa Aruba” ta loke e delegacion di AVP a sigui bisa informador diamars. Reunionan ta continua diaranson.