No obstante reunion cu mediado, welga trahadornan RBC lo sigui

ORANJESTAD – No obstante cu mediador di gobierno a yama FTA cu gerencia di RBC pa un reunion mayan mainta, e welga cu a cuminsa diamars mainta, ta sigui diaranzon. Asina presidente di e sindicato Rudy Dirksz a confirma pa NoticiaCla diamars anochi. “Esey no kier meen cu welga lo para. Welga ta sigui mayan”, tabata palabranan di e lider sindical. E proposicion di Pontilius ta pa FTA reuni 10'or mainta na su oficina. Gerencia, manera cu e portal aki a bisa caba diamars, a informa cu nan no ta duna comentario y ta considera e asunto aki uno interno.

WELGA

Manera e portal aki a raporta diamars mainta, miembronan di FTA na RBC Bank a tuma e decision pa entrante  8'or drenta diamars drenta den un welga pa mustra gerencia di RBC cu trahadornan no ta acepta e forma cu nan ta wordo trata, tampoco ta acepta e decision ni intencion di compania pa kita e beneficio di Plan di Spaar cu ta hancra den CAO cu a wordo firma. E beneficio aki ta acorda den CAO entre FTA y Banco, y no por ser kita for di e trahadornan unilateralmente. NOTA: e foto ta di e accion di diamars mainta.