Angel Bermudez dispuesto pa ta vakminister

ORANJESTAD – Aunke cu e no ta ansioso ni ambiciona pa e funcion, si haci apelacion pa e reemplaza Juan David Yrausquin como minister, e lo ta disponibel pero solamente como vakminister. E ex minister di Transporte y Telecomunicacion di Aruba, Angel Bermudez a confirma esaki na NoticiaCla dialuna atardi. Mes momento e ta bisa si cu no ta prudente e momento aki pa expresa nada otro cu e hecho cu e ‘ta asisti Yrausquin den loke ta parse di ta un crisis constitucional’. For di dialuna rumornan a cuminsa core riba ken e candidato por ta pa eventualmente reemplaza Yrausquin awor cu e la entrega su retiro. Y un di e nombernan cu mas a cay tabata Bermudez, y NoticiaCla mesora a puntra donjo di curpa. 

Bermudez apenas un siman pasa a wordo apunta como e ‘chief of staff’ di Yrausquin, pero awor ta mustra cu e lo por asumi e funcion maximo mes. “E ta un opcion aworaki te ora bin un cambio” Bermudez a sigura NoticiaCla. Pero no ta asina cu e ta considera su mes un ‘front runner’ pa e funcion awor. “Been there, seen that, done that” Bermudez a contesta rapidamente, refiriendo na su periodo como minister den e prome gobierno di Aruba despues di a haya su Status Aparte. E tempo ey la ocupa e funcion di minister di Trafico y Comunicacion di februari 1987 pa maart 1989. Pues tin e experiencia y e conocemento amplio di con politica ta. “Mi no tin echt ambicion politico aworaki y mi no ta excita pa haye tampoco” Bermudez a sigui bisa. E la biba ultimo 20 anja de exterior y durante e periodo ey e no por a vota. De hecho e no ta ni forma parti di un partido politico na Aruba. Pero si haci un apelacion pe, ‘mi tey pa yuda te ora cu no mester di mi ayudo mas”.

Prome cu Bermudez a bira e ‘Chief of Staff’ di Yrausquin, e tabata na cabes di e departamento di impuesto di islanan Bes, esta Bonaire, Saba y Statia. Prome cu esey, e la fungi como socio di Ernst & Young na Corsou y miembro di Raad van Advies, tambe na Corsou. Tempo lo mustra si Gabinete Mike Eman II lo haci un apelacion riba su persona.