Parlamento hubenil tambe a tene nan eleccion

ORANJESTAD - Un siman despues cu Aruba a tene su Eleccion Parlamentario, caminda pueblo a scoge nos gobernante nan pa e siguiente periodo gubernamental. Parlamento Hubenil di Aruba tambe a tene su eleccion anual, caminda a vota pa su directiva nobo pa e periode di september 2017 te cu april 2018. Despues di 3 siman di preparacion intensivo, por a conta cu un atardi bon organisa, yen y cu hopi entusiasmo. Den presencia di staff, ex-directiva, miembro y futuro miembronan, e atardi a cuminsa. Bou guia di e moderador Steve Geerman, a habri e atardi saludando tur presente y cu un momento sagrado p'e Himno Nacional di Aruba. Despues a sigui cu e prome parti di e atardi, cual ta e huramentacion oficial di señorita Natasha Henriquez, cual a sigui e trayectoria necesario pa forma parti di ACHA. E procedura aki a wordo eherce bou guia di ex-presidente Judrick Gario y ex-secretaria Natalie Stokes. Siguientemente a pasa pa e parti di eleccion, caminda tabata tin speech, pregunta y ponencia nan debativo entre tur e candidato nan pa nan respectivo position.

Despues di e votamento y conteo, e resultado nan tabata lo siguiente:

Presidente: Chloe Ruiz

Vice Presidente: Judrick Gario

Secretaria: Paula Castillo

Tesorero: Marie-Jaindrah Gomez

Vocero: David Quant

A haci tambe un reformation di tur comision, caminda miembronan y futuro miembronan por a scoge den cua comision nan lo kier forma parti di dje.

E comision nan cu e hoben nan por a scoge di dje ta lo siguiente:

Comision Minister Hubenil

Comision Summer Courses

Comision Election Escolar

Comision Bonding

Comision Relation Publico

Comision Reglementen

Comision Fundraising

Comision Cas

Despues di esaki a cera e parti oficial y despues a pasa pa e "after party" unda cu e hobennan a disfruta di snack, musica y un atardi ameno. Por ultimo, pa pone e cherry riba e bolo, Staff a surprise tur hoben presente cu un instructor cu a duna e hoben nan les di baile. Parlamento Hubenil Aruba kier felicita e directiva nobo y desea nan lo mihor pa cu e trayectoria nobo aki.