Aruba den Ceremonia di Bandera di Weganan Suramericano Hubenil Santiago 2017

ORANJESTAD - Diahuebs merdia, e delegacion Arubano participando na e Weganan Suramericano Hubenil Santiago 2017 a keda oficialmente yama bon bini na Santiago de Chile. Den e Parke Olimpico di Chile cerca di e Estadio Nacional Julio Martinez a tene e tradicional ceremonia di bandera unda tur e paisnan participante na e “2do Juegos de la Juventud Santiago 2017”. Na e weganan aki e 14 paisnan di e continente Sur America lo bataya den e 20 deportenan unda mas cu 1500 atleta den e edad di 14 – 17 aña lo competi sanamente defiendo e bandera di nan pais. E ciudad anfitrion Santiago y su hendenan a yama bon bini na henter nos delegacion di atleta, coach y dirigentenan. Mester bisa cu pa Aruba, e staf di coachnan hunto cu e staf medico y tecnico a presenta na e ceremonia di bandera mirando cu e atletanan lo yega diahuebs den oranan di anochi lat na e cuidad di Santiago for di Panama. Presente hunto e delegacion nos por a mira Presidente di COA, sr. Roy Mezas y miembro di directiva di COA, sr. Menno Vinck. Despues di a hisa nos bandera acompaña pa e tono glorioso Aruba Dushi Tera, hefe di mision sra. Kamilah Dammers-Naddall a intercambia regalo cu sr.Michael Black kende ta e director ehecutivo di e Weganan Suramericano Hubenil Santiago 2017. E Weganan Olimpico di Rio 2016 a inicia oficialmente mientras diabierna lo tin e Ceremonia di Apertura.