Banco Central cu encuesta Nos Cartera y Nos Finanza

ORANJESTAD - Durante e periodo di 30 di september te cu 19 di november 2017, Banco Central di Aruba (CBA) lo tene e encuesta yama “Nos Cartera y Nos Finanza” pa di tercer biaha. Encuestanan anterior a tuma lugar na 2010 y 2013.

Cu e encuesta aki, CBA lo kier produci informacion valioso riba e posicion financiero di e unidad familiar na Aruba, pa cual actualmente tin poco informacion. Informacion cu lo pidi ta regarda e entrada di e unidad familiar, con e comportacion di fia y spaar ta y e abilidad di paga gastonan mensual. Cu e informacion aki lo por identifica areanan problematico y e gruponan vulnerable den nos comunidad Arubano, cual lo contribui na formulacion y implementacion mas efectivo di maneho pa loke ta trata e posicion financiero di e unidad familiar. Mas ainda, e informacion adkeri lo asisti CBA den su analisis di e desaroyo economico na Aruba.

Durante e periodo aki, CBA lo tin un grupo di 20 encuestador cu lo bishita 1,400 unidad familiar Arubano pa por haya e informacion cu ta di sumo importancia. E bishitanan aki lo tuma lugar mas tanto durante e oranan di anochi y den fin di siman. E encuestadornan lo tin un carchi di identificacion y un carta di notificacion como prueba cu nan ta trahando pa CBA. E respondientenan por tuma contacto libremente cu CBA si nan tin pregunta adicional.

CBA ta realisa cu gran parti di e informacion rekeri ta di un grado sensitivo, y p'esey ta enfatisa cu tur e informacion recibi lo keda confidencial y lo uza nan solamente den un formato agrega pa propositonan estadistico. Mirando e importancia di e datonan aki, CBA ta spera cu e unidadnan familiar Arubano lo coopera grandemente cu e encuesta aki. Pa mas informacion, por favor tuma contacto cu señor Jonathan Upegui, Economista na CBA y alaves lider di e proyecto, na telefon 5252215 of via email: j.upegui@cbaruba.org.