Refunjol: Parlamento mester asumi rol di controlador di gobierno

ORANJESTAD – “ E rol cu te awe mi ta haya cu ta faya na Aruba ta Parlamento”. Asina ex gobernador di Aruba Fredis Refunjol a declara diaranzon despues di a sali for di reunion cu actual Gobernador Boekhoudt. Aki e ta referi riba e tarea cu Parlamento mester tin. Segun Refunjol, e ta haya cu si Parlamento tuma su rol como controlador, como hefe di gobierno, anto e ora e asuntonan ta bay hopi otro.

MINISTER

E ta recorda cu un minister ta wordo yama pa duna cuenta, aunke cu e ta bo mesun minister. “Y eynan mi ta kere cu nos mester crece como pais. No necesariamente si un partido yama un minister pa duna responsabilidad den Parlamento, cu ta (nifica cu) bay bahe of cu tin desconfianza. Nos mester ta transparente. Transparencia como minister, (ta) accountable” Refunjol a sigui bisa.

METEMENTO

Problema aki na Aruba segun Refunjol, hopi biaha ta cu e votadornan kier mete cu cosnan diario, maneho diario (di gobierno). “Unabez cu bo scoge politiconan den Parlamento, bo mester tin confianza cu nan por haci e trabou”. Pa un coalicion, si bo tin palabracionnan y hende ta tene nan mes na palabracion (e mester por funciona).