Retiro Fred Weijenberg for di KIA ta entrante 1 di december awor

ORANJESTAD — E noticia di NoticiaCla.com di retiro di e presidente di e management team di KIA, Fred Weijenberg, a keda confirma diamars pa e propio Weijenberg, den un entrevista cu e vespertino Amigoe. Segun e vespertino, e retiro ta entrante 1 di december proximo unda cu Weijenberg ta bolbe Hulanda. E ta desmenti informacion cu ta pasobra e lo tin problema cu demas miembro di e management team. “Mi no sa unda nan ta saca e informacion ey” e presidente di e management team a declara. Si pa e fecha di 1 di december no tin un reemplazante, e unico otro miembro di e team, Dick van Leenen ta keda den funcion como e cabes di prison. Weijenberg a bisa cu e la entrega su retiro diabierna ultimo serca minister di husticia.

Posibilidad pa e ex alto comisario di polis Peter de Witte bira e proximo director di e prison, ta keda vigente. Solamente cu segun e mandatario encarga cu husticia, un persona local tin preferencia. Minister Arthur Dowers, segun Amigoe, a bisa cu e la bisa de Witte pa solicita, pero de Witte ta keda number dos, pa asina duna chens prome na un persona local. De Witte den combersacion anterior cu NoticiaCla.com a mustra cu e no a dicidi ainda kico e ta bay haci, y cu e ta den proceso pa retira como hefe di polis di St Maarten.