Encuesta: Grupo grandi a dicidi te diabierna pa ken nan vota

ORANJESTAD –Un grupo grandi di persona (24.1%) a dicidi diabierna pa ken nan mester a vota. Por lo menos, entre e grupo cu a participa den e ultimo encuesta di NoticiaCla y Doc Opleidingen di diabierna. Compara cu otro encuestanan, e interes pa participa den e ultimo aki, tabata menos. For di diabierna cu NoticiaCla y Doc Opleiding a publica e encuesta, e reaccion tabata tiki y a yega apenas 323 participante a contesta, cu no ta suficiente pa por yega na un conclusion y ta representativo. Como tal, nos no ta ‘claim’ cu e ta representativo, y esaki te hasta ta nada mas di un indicacion di esnan cu a responde. No obstante esey, e ta keda un resultado interesante. Un di e factornan tabata e horario cu esaki a keda publica y cu unabez cu e resultadonan di e eleccion a cuminsa drenta, ya e interes no tabatey mas. Of no tabatin mas tempo pa participa, y obviamente e prioridad tabata otro.

RESULTADO

E resultadonan mas interesante, no obstante e reaccion pober, tabata manera informa caba, e grupo di persona cu a dicidi riba e dia di eleccion pa ken nan ta bay vota, esta 24.1%. E grupo mas grandi sinembargo a dicidi 6 luna prome caba, cu ta 32.5%. Por corda cu durante e encuestanan, e grupo cu tabata indeciso tabata na ultimo casi 16%.  

CONFIRMACION

Loke si e encuesta ta confirma, ta cu e hende cu ta reacciona riba encuestanan di NoticiaCla ta un grupo specifico di nos poblacion. E grupo aki ta rond di Aruba, di edad varia pero relativamente bon educa. Esey ta haci cu nan opinion politico no ta compara cu opinion politico di Aruba en general. Loke ta remarkable ta cu nan opinion a keda basta stabil. Den tur 6 encuesta, e resultado di nan preferencia a keda similar. Den e grupo aki, e sorpresa ta cu RAIZ tin un acceptation bastante halto.

Segun e tabel inclui, e encuesta tabata hopi ‘over’ na Noord y Santa Cruz, y pober na San Nicolas y Savaneta.

NoticiaCla.com y Doc Opleiding kier a gradici tur hende cu a coopera cu nos encuestanan. Nos lo evalua ki momento ta bon pa nos haci otro encuesta, y nos lo traha pa yega na un mihor representation di e poblacion di Aruba, pa asina por haña sa tiki mas kico ta biba den comunidad. Lesa e resultado AKI.