Lidernan politico cu asiento cla pa asumi responsabilidad

ORANJESTAD – Despues cu Gobernador Alfonso Boekhoudt a reuni cu lider di partido AVP Mike Eman, ela sigui e ronda di combersacionnan unda cu cada uno a presenta nan scenario na e cabes di gobierno. Basa riba e informacion acumula, Gobernador lo sa di tuma su proximo paso den e ronda di combersacion. E intencion ta pa diamars finalisa e ronda di combersacion cu partidonan politico cu no a logra un asiento.

MEP

Lider di partido MEP Evelyn Wever tabata cauteloso cu su palabranan, siendo un audiencia cu Gobernador. Sinembargo e tabata cla si riba e hecho cu, contrario na declaracion di Eman cu no ta bay forma gobierno y no ta bay den Parlamento, cu MEP si lo asumi e tarea si e wordo poni den su man. Segun Wever, ta p'esey a bay eleccion y si bay haci algo otro, ta miho no bay eleccion anto. A desmenti cu tin combersacionnan extenso cu Otmar Oduber, cu ta apenas diadomingo ela combersa cu Oduber pa felicit'e. Pero cu combersacionnan lo por tuma lugar si.

POR

Lider di partido POR Otmar Oduber no a bisa mucho mas cos nobo cu e no a bisa caba den un conferencia di prensa mas tempran. A reitera un biaha mas cu e no ta dispuesto pa sinta cu partido AVP, pero cu si ta haciendo tramite pa sinta cu partido MEP si cos mester yega asina leu.

RED

Lider di partido RED, Ricardo Croes tabata basta cla, indicando cu nan ta habri pa tur partido, y a pone ‘zero’ condicion pa papia cu e partidonan. Semper y cuando e combersacionnan ta cuadra cu programa di partido, Croes no tin problema pa drenta gobierno y fiha su posicion den parlamento. A mustra riba su cantidad di voto y con contento e ta cu e logro aki. Riba e pregunta di pelea entre AVP y MEP y e posibilidad di caida di gobierno debi na inestabilidad cu posibel coalicion, Croes a pidi pa stop di enfoca riba Corsou y su problema di coalicion y pa pone mas atencion riba e problemanan cu un solo gobierno a causa na Aruba durante e ultimo 16 añanan.