Analisis: Pueblo no a vota pa coalicion!

For di momento cu e resultado tabata conoci, of tabata birando conoci diabierna, varios hende, y cierto medionan di comunicacion a cuminsa papia riba un coalicion. Cu ‘pueblo ta scogiendo pa un coalicion’ of cu ‘pueblo a scoge pa un coalicion’. Esey no ta berdad. Pueblo NO a scoge pa un coalicion. Bo no sa esey. Pueblo a bay urna electoral y a vota pa esnan cu nan tabata kier. Cu e resultado a sali cu e dos partidonan grandi a haya mesun cantidad di asiento, ta un otro cos. E resultado a sali manera ela sali, cu ta obliga formacion di un coalicion. Punto. Of bay eleccion atrobe pa duna pueblo (lamentablemente) un chens mas pa tin un bista mas ‘cla’. Y atrobe eynan bo NO por bisa cu e ora ey si nan a vota pa un solo gobierno of un OTRO coalicion. Pasobra e votador aki, of esun aya, no sa kico e otro a vota p'e, pasobra e voto ta secreto toch? Ta dia cu tin un referendum cu e pregunta 'bo kier un coalicion', of ‘bo no kier un coalicion’, bo por sa sigur cu pueblo kier un coalicion of no. Hopi ta grita cu ‘pueblo a bisa cu nan kier pa AVP y MEP traha hunto’. Tampoco ta berdad. Hendenan di AVP no kier MEP y hendenan di MEP no kier AVP. Cu AVP y MEP tin cu traha hunto, ta leuk pensa, but isn’t gonna happen. At least not den e lifetime aki.

Esey ta pone cu loke ta keda, ta formacion di un gobernacion entre esnan cu a haya asiento y cu KIER traha cu otro, locual no ta laga caminda pa mucho alternativa. MEP y POR a bisa caba cu nan kier y ta dispuesto pa traha hunto. Partido AVP ta cla pa castiga POR, pasobra kere cu nan ta bay sinta man cruza den oposicion, ta manera kere den web’y guy. Mientras cu nos ta speculando, e ta casi un ‘given’, cu AVP lo haci tur posibel pa stroba POR di goberna. Con? Door di presenta cosnan di pasado, recorda e pueblo kico tur e lider di POR a haci of keda sin haci. No keda sorprendi cu documentonan diripiente lo cuminsa aparece den prensa, den box, cu ta culpa otro di tur sorto di cos. Lo tin tension tambe den e gabinete ora cu cierto cosnan cuminsa aparece. No ta tur hende den MEP ta contento cu un posibel union cu POR. Hopi ta wak POR como un partido cu tin mucho bagage negativo di pasado, y no kier ta asocia cu ne. Ta mira un coalicion cu hopi tension, y cu un bida cortico. E bida cortico ey Dios sa con cortico e lo ta. Esey ta keda ‘den laira’. Tempo lo bisa.