Eman ta sigui como lider di partido AVP te ora haya reemplazo

ORANJESTAD – Mike Eman ta keda lider di partido AVP por lo pronto. Asina NoticiaCla a compronde di e campo di Eman diadomingo atardi. Inicialmente Eman a bisa diabierna anochi cu e ta retira y ta laga e campo pa un successor. No ta mucho cla si for di e momento ey e lo a dicidi si ta keda mientrastanto te ora cu tin un lider nobo. Pero noticianan cu a cuminsa circula diadomingo cu ‘Eman ta bolbe toch’, a pone e portal aki verifica un que otro, y a resulta cu enberdad, a dicidi despues cu ta keda, ‘te ora cu un lider nobo keda anuncia y of apunta’.

RICHARD ARENDS

Den pasiyo, ta menciona nomber di Richard Arends como e posibel reemplazante di Eman, aunke for di Arends a compronde cu e no ta na altura di esaki. Tabatin un scenario desaroyando cu ta papia di posiblemente haci e cambio liher di lider temporal, pa asina laga AVP forma un gobierno ainda, unda cu ta ‘reemplasa e prome 4 miembronan di partido’, eliminando e ‘barera’ pa por forma gobierno cu Otmar Oduber. Tur esaki sinembargo ta un ‘teoria di conspiracion’ pero tabata un tema hopi discuti den fin di siman. Oficialmente, Eman ta keda ainda por lo pronto como lider di e partido berde.