Hulanda lo evalua ley di reino hulandes riba supervision financiero na 2015

DEN HAAG – E ley di reino (rijkswet) riba supervision financiero y tambe riba tereno policial y husticia pa e cuater paisnan den Reino Hulandes, incluyendo Aruba, e.o. Aruba lo wordo evalua den 2015. E trabou ey lo wordo haci pa un comision independiente. Esaki minister di relacionnan di Reino Ronald Plasterk a skibi den e concepto di presupuesto cu a keda entrega na parlamento di Hulanda diamars.

Henter e anja 2015 ta den cuadro di evaluacion di palabracionnan y cambionan cu a drenta na vigor riba e fecha 10-10-10 segun Plasterk. Pa Caribe Hulandes esey ta nifica cu lo mira con e structura estatal nobo di Bonaire, Saba y Statia a desaroya. Ta banda di esaki, e leynan ariba menciona lo wordo evalua.

Cooperacion economico dentro di Reino Hulandes lo keda fortifica unda cu ta posibel. E intercambio di conocemento y experticio riba tereno di elaboracion, comercio internacional y tratado, ta para central aki. Hulanda por, riba peticion di e islanan, pone ayudo disponibel. Tambe otro tipo di cooperacion ta wordo promovi.

Pa mas desaroyo economico, social, cultural, un bon gobernacion ta esencial segun Plasterk. Un gobierno cu ta traha eficiente ta gana di e confiansa di e comunidad. Cobransa eficiente di impuesto segun Plasterk, ta evita deficit innecesario y problema di pago serca gobierno. Como tal Hulanda kier contribui na desaroyo di cierto balornan y metanan den Reino.

Y finalmente, fin di 2014 e taskforce di derecho di mucha, cu a keda instala durante e ultimo conferencia di reino, lo bin cu un plan di accion. A base di esey, lo sigui na 2015 cu un mehoracion di derecho di mucha den paisnan di Reino Hulandes. Riba e agenda di e conferencia di reino, na comienso di 2015, lo continua cu e mehoracion cu tin poni riba agenda.