Partido MEP a tene nan Parada di Cambio

ORANJESTAD – Parada di MEP a tuma lugar diadomingo, despues cu partido AVP a dicidi di cancela esun di nan, como e partido ganador. E resultado di e eleccion parlamentario di diabierna a duna partido AVP como e partido mas grandi, cu consecuentemente tin e derecho pa tene su parada. Sinembargo nan a informa polis cu nan no ta sigui cu e parada. Esaki pasobra nan no ta sinti cu nan a gana e eleccion, aunke cu cifranan ta duna nan si como e partido mas grandi. Polis e ora a opta pa duna e opcion na partido MEP cu tambe a haya e mesun cantidad di asiento cu AVP, esta 9, pero tabata poco mas menos den cantidad di voto. Partido MEP a dicidi di organisa un ‘Parada di Cambio’ unda cu a pone tur candidato den un trailer na comienso di e parada y cuminsa na San Nicolas, recore Aruba y termina esaki na cede di MEP na Santa Cruz pa un meet and greet. E parada a cuminsa pa 12’or y a termina 5’or na e cede.