Algun politico a cay hopi den voto, otro a crece hopi

ORANJESTAD – Mientras cu e hecho di ta un partido cu a logra su prome dos asiento den su prome salida, y cu apenas 8 luna di existencia ta uno extremadamente positivo, tin un otro realidad cu e partido POR ta confronta cu ne. Despues cu NoticiaCla tabatin e primicia cu e lista di votonan individual diasabra anochi, a conoce e realidad tambe cu e partido cu su integrantenan principal a bay mas atras den voto, cu cualkier otro partido. Sigur e prome tresnan, esta Otmar Oduber, Andin Bikker y Marisol Lopez Tromp. Banda di esey, tin un candidato cu a participa na 2009 pa AVP y bira minister y awor a bolbe subi, esta Richard Visser cu a cay cu 87% den voto compara cu 2009. 

RESULTADONAN

E candidato cu a bay mas atras tabata Marisol Lopez Tromp cu a conoce 70% reduccion di voto compara cu eleccion pasa. Ta sigui Andin Bikker cu 64% di reduccion di voto y Otmar Oduber cu 55%. Den partido AVP tambe e candidatonan principal a bay atras. Aki por papia di Benny Sevinger cu a registra e perdida di mas grandi di voto den e partido, cu 29%, sigui pa Arthur Dowers cu 28%, Mike Eman 5% y Mike de Meza cu 3%. Ta sigui partido e lista combina di UPP/PPA unda cu Booshi Wever a conoce un caida di 66% di voto personal, sigui pa Benny Nisbet cu 39% di perdida di voto. Pa loke ta e prome candidatonan di MEP, aki nan a conoce un crecemento di voto personal. Esun cu a conoce un crecemento mas grandi, ta Dangui Oduber cu 37% mas voto, sigui pa Xiomara Ruiz Maduro cu 10% mas voto, Glenbert Croes cu 5%, Evelyn Wever Croes cu 3%. Esun cu a perde mas voto den nan, ta Chris Romero cu a cay cu 18% den voto personal.

E GANADOR

Pa loke ta esun cu a crece mas hopi den voto compara cu e eleccion anterior, ta lider di partido RED, Ricardo Croes cu a conoce un aumento di 681% den voto personal. Comparacion di candidatonan clave cu nan eleccion anterior:

Wak e comparacion di esnan cu a cay hopi versus esnan cu a gana hopi voto, AKI