Eman a concede victoria di eleccion na otro partidonan cu asiento

ORANJESTAD - Lider di partido Mike Eman a concede victoria di e eleccion Parlamentario 2017 na otro partidonan cu a logra asiento. Na mes momento a anuncia cu ta inicia e proceso pa un liderazgo nobo di AVP enfatisando cu e resultado ta indica cu e instituto politico mester bay traha pa gana e confiansa bek di mayoria di e pueblo Arubano. "Mi ta felicita esnan cu mester bay asumi e reaponsabilidad di gobernacion y anos ta tuma nos responsabilidad tambe," asina Eman a bisa prensa na Cas di Partido rondona pa colega y simpatisantenan. Cu esaki tambe, Eman ta concede su asiento y ta traha caminda pa otro persona tuma su posicion. 

RESULTADO ELECCION

Eman a bisa cu mientras cu den cifras, nan a gana eleccion, e resultado real sinembargo ta otro y cu pueblo a manda un mensahe cla. E hecho cu el a declara algun dia prome cu e no ta dispuesto pa traha cu partido POR, a pone cu dificilmente e lo por a forma un gobierno di coalicion. Recientemente den un entrevista el a declara cu un coalicion ta 'desastroso' indicando cu e no ta dispuesto pa un coalicion y ta prefera ta den oposicion. E partido a bay atras 4 asiento (di 13 pa 9), mientras cu nan tabatin e speransa di yega e maximo di 15. No obstante e resultado, AVP siendo e partido mas grandi, lo por haya e peticion di Gobernador pa ta e prome pa forma gobierno. Lo mas probable ta cu e lo informa Gobernador di su desicion y pasa e trabou pa e otro partido cu tambe a haya 9 asiento, esta MEP. Dialuna e reunion di consulta ta cuminsa y Gobernador a pidi tur partido pa tene dialuna y diamars habri pa por schedule e prome ronda di combersacion.