Partido AVP a keda esun mas grandi den eleccion 2017

ORANJESTAD - Faltando dos urna (Maria Gorreti y Sabana Basora SPO), e resultado di eleccion parlamentario 2017 tabata practicamente un hecho. Algo pasa di 2 or di marduga, tabata obvio cu mientras cu AVP a keda e partido di mas grandi den voto, den practica, ta improbable cu nan lo ta formando e proximo gobernacion (lesa otro articulo). AVP (faltando e dos asientonan) a logra 22609 voto cu ta traduci den 8 asiento + 1, pa 9 asiento. MEP a logra 21298 voto cu ta 7 asiento + 2, pa 9 asiento tambe. POR a logra 5344 voto cu ta 1 asiento + 1, pa 2 asiento. Y partido RED a logra 4015 voto cu ta bon pa 1 asiento. E otro 4 partidonan no a logra asiento. RAIZ a haya 2058 voto, UPP/PPA 640, Curpa 455, Mas 272. 

E RESULTADO

Pa varios partido e resultado a bin como un sorpresa. Sigur pa partido berde AVP, cu a conta riba un mayoria absoluto di 11 of mas asiento, basando nan mes riba e respaldo riba caya e ultimo dianan. Como tal e resultado tabata un sla formal pa e partido, unda cu e lider a concede su posicion (lesa otro articulo). Partido MEP berdad tin 9 asiento awor (inoficial), pero mester tene cuenta cu e dos asientonan cu nan a haya, ta rest zetels, pues nan no a crece cu asiento limpi. Asina mes ta considera cu e partido a crece cu dos asiento. E lider di partido a bisa cu e ta satisfecho, aunke cu lo ideal tabata pa tin e mayoria absoluto. Segun Wever, si analisa e resultado, e tin un nificacion mas special si pone den contexto cu loke e otro partidonan a haya y pasa aden. Partido POR, mientras cu nan a aspira ambiciosamente pa 4 te 5 asiento, a logra 'solamente' 2 asiento. Sinembargo, nan ta mire como un logra grandi y ta considera e unico partido cu a gana, mirando cu ta apenas den 8 luna nan a logra tur esaki. Gritonan cu RED a lotra casi mescos sin tin bandera y of sticker, ta absurdo segun e lider politico, pasobra RED ta un partido di 10 aña cu tin un base caba. Pues e ta un otro forma di wak, mester wak e partido su logro. Lider di partido RED, Ricardo Croes tabata contento cu e resultado, y ta warda wak kico e partidonan grandi lo haci prome. Nan ta dispuesto pa sinta cu e partidonan. Ademas a mustra cu ningun momento ta asina cu e hecho cu RED a haya asiento, ta nifica cu lo bay legalisa marijuana, manera cu ta wordo insinua. "Esey no ta berdad pasobra mi no a bisa esey" Croes a bisa NoticiaCla diasabra marduga despues di e resultado. 

URNANAN PENDIENTE

E tardansa den resultado di e dos urnanan lo no cambia e resultado di tal forma cu e ta trece cambio den reparticion di asiento. Un di e urnanan, Maria Gorreti, a confronta problema cu un cantidad di stembiljetten(22), pa cual e checkersnan (hende cu ta controla), lo a pidi un reconteo. No ta conoci pakico tabatin retraso cu esun di Sabana Basora SPO. Foto ta di facebook page di Mike Eman.