Meteo a emiti aviso pa calor excesivo na Aruba

ORANJESTAD – Servicio Meteorologico a decreta un aviso pa calor excesivo pa Aruba valido di 12 pm diamars 19 september te 6 pm diabierna awor, esta dia di eleccion. Ademas ta spera un continuo prolongacion di tempo humedo den e siman aki te weekend aki.

CALOR

Un gradiente di presion abou causa pa horcan Maria lo produci un biento zwak di Noord te noordoost. E caracteristica aki lo perdura pa motibo cu horcan Maria lo keda den becindario di noordoost di Caribe

TEMPERATURANAN

Temperatura nan maximo di diamars pa diabierna lo oscila di 33 pa 36 grado Celsius…porcentage di humedad den 80 te 89% lo contribui na un indice di calor (temperatura aparente) rond di 40 te 44 grado Celsius cada dia.

MAXIMO

E calor y humedad halto lo no baha mucho anochi cu temperatura bahando solamente te un minimo di 27 grado. Esaki lo aumenta e peligro pa hendenan cu no por haña un lugar adecua pa refresca nan curpa.

ASESINO

Calor excesivo ta e asesino di tempo nr. 1 segun Meteo. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu malo di curason ta esnan mas expone. Limita actividad pafo di cas pa oranan trempan di mainta of ora solo baha. Si bo tin un airco cu ta funciona, uz'e …of a lo menos habri bentana pa laga aire pasa y circula.

ACCION DI PRECAUCION

Un aviso pa calor excesivo ta nifica cu un periodo di temperatura halto ta wordo spera. E combinacion di temperatura y humedad halto lo combina pa crea un situacion den cual malesa causa pa exposicion prolonga na temperatura halto lo por presenta. Bebe hopi likido, keda den camber cu airco…keda aleha for di solo.