Caribe Hulandes a haya basta atencion den troonrede

DEN HAAG/ ORANJESTAD – Caribe Hulandes a haya mas atencion cu nunca den e discurso di Rey Willem Alexander durante apertura di aña parlamentario 2017/2018 awe mainta. Den e asina yama ‘troonrede’, e Rey a habri cu e situacion di St Maarten y resto di Isla Riba, cu tabata remarcabel pero comprendibel pa tur. Sigur despues di e desaster cu a keda atras cu pasada di e horcan Irma recientemente. "Riba Prinsjesdag tur wowo tradicionalmente ta riba Den Haag. Pero awe nos curason y pensamento ta cu e habitantenan di St Maarten, Saba y St Eustatius cu a wordo afecta seriamente pa e forsa devastador di horcan Irma" e Rey a cuminsa cu su discurso. "Nos tur ta convivi intensamente cu e situacion. Hustamente den e circumstancia asina dificil, e union den Reino (Hulandes) ta bira visibel", e Rey a sigui bisa. 

MAS ATENCION

Fuera di Isla Riba, Relacionan di Reino a haya mas atencion tambe, compara cu algun frase di normal. Entre nan, a informa cu (manera ta conoci), Hulanda a compromete cu yuda St Maarten y resto di e parti Caribense Hulandes. Entre e ayudo, a haci mencion di e Team Bestrijding Ondermijning, cu ta encera cu e criminalidad cu ta pasando fronteranan. “E trabou di e team aki ta wordo prolonga cu 4 aña desde 2018, y a pone 12 miyon euro disponibel pa esaki” .

PASANTIA

“Relaciona cu e situacion di seguridad internacional, Kustwacht ta haya e aña aki y otro aña total 8 miyon euro na fondo pa fortifica e esfuerso y tambe mantencion”. Ademas ta papia di cu pa islanan BES, (Bonaire, Saba y Statia) ta wordo inverti den talento hoben, manera ofrece lugar pa pasantia pa ambtenaarnan hoben, pa asina percura pa e gobierno y aparato gubernamental funciona bon pa por tin un desaroyo gobernabel, democratico y social economico. Lesa e discurso completo AKI.