Hooyboer: Scolnan sin airco ta stop 11’or di mainta e siman aki atrobe

ORANJESTAD – Scolnan cu no tin airco na Aruba, lo caba 11’or di mainta pa resto di e siman aki. Minister di enseñansa Michelle Hooyboer a confirma esaki pa NoticiaCla dialuna merdia. E ta e mesun decision cu a tuma dos siman, y ta aplicabel entrante mayan te diahuebs. Diabierna ta liber debi na eleccion. Esaki kier men cu tin mas of menos 25 (di 83 scol) na Aruba cu no tin airco pa cual e regla aki ta valido. “E decision di calor e siman aki ta un asunto cu ta discuti entre directivanan di scol y inspectie” e mandatario a sigui bisa. “Nos a tuma e decision pa corta e dia di scol den e siman cu tabata mas calor cu normal, debi na horcan Irma”. E ta sigura cu e decision ey a wordo tuma pa ministerio di enseñansa hunto cu inspectie, y despues directivanan di scol a wordo informa. “Na ningun momento durante e siman ey, SIMAR a comunica cu nos” e mandatario a sigui bisa. “Awor nan tin un carta, aunke atrobe, e decision ta uno tuma entre ministerio di enseñansa , inspectie y directivanan di scol, cu input di servicio meteorologico di Aruba”. Mientrastanto for di e minister a compronde cu na Corsou scolnan lo kita ‘apenas’ 30 minuut di e horario regular, pues eynan scolnan cu no tin airco, lo caba 12:30pm en bes di 1’or.

SIMAR

Manera e portal aki a raporta anteriormente caba, sindicato di maestro a yama un reunion di urgencia pa awe nochi, relaciona cu e situacion di tempo calor na Aruba y airco den tur local di scol. E comunicado cu e sindicato a circula awe mainta, ta menciona cu nan a haci un peticion na minister di enseñansa pa tuma pasobra e siman aki relaciona cu calor atrobe. Pero minister lo no a reacciona. Como tal a convoca e reunion pa awe nochi 6’or unda cu a pidi tur maestro y cabesante di scolnan pa acudi, y asina opina riba e tema. Ta trata di un posibel solucion pa e proximo tres dianan cu segun Meteo, lo ta hopi calor atrobe. Siman pasa tabatin algun dia cu a dicidi cu ta manda muchanan cas for di 11am debi cu tabata mucho calor. Pero despues a cambia esaki atrobe pa oranan normal, siendo cu p.e. na Corsou, si a adapta e orario.