BCA: Entrada di gobierno a subi na juni 2017 compara cu 2016

ORANJESTAD - Na juni 2017, entrada di gobierno a suma Afl. 103,4 miyon, cual ta Afl. 19,2 miyon mas compara cu e mesun luna di e aña anterior. Esaki segun informacion di Banco Central di Aruba suministra dialuna. Segun BCA, e subida aki a resulta principalmente for di un aumento den entrada no relata na impuesto (+Afl. 18,1 miyon). Tambe, entrada di impuesto a crece marginalmente (+Afl. 1 miyon).

E expansion den entrada di impuesto ta relata principalmente na subidanan den accijns riba cerbes (+Afl. 3,3 miyon), entrada di benta di negoshi (B.B.O.) (+Afl. 2,2 miyon), e asina yama “overdrachtsbelasting” (+Afl. 1,5 miyon) y impuesto riba entrada (+Afl. 1,1 miyon). Di otro banda, bahadanan a wordo registra den entrada di impuesto riba ganashi (-Afl. 1,8 miyon) y accijns riba tabaco (-Afl. 1,6 miyon).

CAFT Y GOBIERNO

Den ultimo rapport di CAft, nan a mustra ‘atrobe’ cu nan no ta kere cu gobierno por cumpli cu e meta di genera suficiente entrada, y cu e.o. BBO su cobransa lo cay atras. Sinembargo gobierno cada bes tabata contradeci nan, bisa cu CAft tin cu stop di ‘extrapola’ cifranan di algun luna pa henter aña, ya cu ta conoci cu tin lunanan cu ta genera mas entrada na varios tipo di impuesto, compara cu otro lunanan. E cifranan actual ta comproba esaki tambe, si tuma nota di e informacion suministra pa BCA. Nota: esaki ta parti di un comunicado cu por lesa completo AKI.