Polis a los tiro riba sospechoso agresivo na Macuarima

SANTA CRUZ – Polis a los tiro awe riba un sospechoso cu tabata buscando problema. Vocero suplente di polis Liliana Rasmijn a confirma cu pa mas o menos 15:15 yamada a drenta na warda di Polis Sta Cruz pa un problema entre pareja (echtelijke twist) na un cas na macuarima. Patruya di Sta Cruz ta bay di biaha na e cas en cuestion. Na yegada patruya ta topa cu e situacion na unda e meneer lo ta agrediendo dos señora y tabata agresivo. Ora e la wak polis e la coi un biga y keda bin riba e polisnan. Polis a pidi pa versterking y a dune varios aviso pa pone e biga abao pero e persona en cuestion a keda bin riba polis. Aki e polis a haye obliga di uza su arma reglamentario y los un tiro. Despues di esey ainda e sospechoso a keda resisti contra polis . A pidi pa ambulance na unda na su yegada e la wordo atendi y hiba hospital. Su situacion ta stabil y for di peliger. Departamento di recherche a yega na e sitio , departamento forensico , comisario Hassell y tambe slachtoffer hulp. E caso ta bao investigacion. Foto ta di archivo di KPA.