RBC: Asombra di e accionnan di ayera di empleadonan guia pa FTA

ORANJESTAD - RBC Royal Bank Aruba a keda asombra di e accionnan di ayera di empleadonan guia pa FTA. Asina e banco ta reacciona den un comunicado di prensa. Manera ta conoci e trahadornan (manera NoticiaCla a raporta ayera) a bay den accion pa protesta un decision di e compania. RBC den nan reaccion ta bisa cu nan ta comprende cu e accion industrial di un grupo di su empleadonan di awe mainta por a causa consecuencia pa algun di nan cliente, y nan (e banco) ta pidi disculpa pa e inconveniencia.

FTA

E accion tabata guia pa Federacion di Trahadornan di Aruba, (FTA), e sindicato cu ta representa algun empleadonan di RBC Aruba. Como parte di e contrato colectivo di trabou acorda cu FTA, e empleadonan tin derecho di drenta den accion. “ Pa motivo cu e ta trata di un asunto interno y ta concerni nos empleadonan, nos no ta duna mas detayes. Sinembargo, nos por comparti cu nos ta keda asombra di e accionnan di nos empleadonan, guia pa FTA” e comunicado a sigui bisa.

LEY

RBC ta respeta ley di labor di Aruba y ta keda compromete di traha hunto cu su empleadonan y otro stakeholders pa mantene nan derechonan y sostene nan prosperidad. “ Nos empleadonan ta para central den tur lo cual nos ta hasi. Nos ta sigui trata nan cu dignidad y respet segun cu nos organisacion ta desaroya y duna nos cliente un experiencia distintivo”.

RELACION

RBC a bisa tambe cu nan ta valora e relacion duradero y bilateral cu nan a desaroya cu FTA, como organisacion cu ta representa e empleadonan. “Nos ta spera pa un oportunidad di reuni cu FTA pa resolve cualquier diferencia di opinion na interes di nos empleadonan” e comunicado ta finaliza bisando.