Ceramento di caminda y desviacion di trafico riba caminda Oranjestad, Cumana pa Sta Cruz

Posted on 9/14/2017, 5:50 PM AST | Updated on 9/14/2017, 5:51 PM AST

ORANJESTAD - Departamento di Obra Publico ta informa pueblo di Aruba en general y specialmente nos automobilistanan cu ta haci uso di e caminda principal di Oranjestad pa Santa Cruz, na e rotonde nobo di Cumana, cu entrante dialuna 18 september 2017, ta bay cera e caminda entre e rotonde nobo y e caminda pabou di edificio di ex-Codemsa. Motibo ta cu ta bay cuminsa cu e trabou nan di reconstruccion di caminda cu conexion cu e rotonde nobo di Cumana. Lo cera e caminda menciona pa tur trafico den ambos direccion.

E desviacion nan di caminda ta lo siguiente:

Trafico for di Oranjestad direccion Sta Cruz, ta wordo desvia na e rotonde di Tarabana pa e caminda di Meiveld y despues di a pasa patras di ex- Codemsa lo bira na man drechi direccion zuid y sali bek riba e caminda principal direccion Sta Cruz; Trafico for di Oranjestad direccion Airport, ta wordo desvia na e rotonde di Tarabana pa e caminda di Meiveld y despues di a pasa patras di ex- Codemsa lo bira na man drechi direccion zuid y sali bek riba e caminda principal direccion pabou, pasa riba e rotonde nobo di Cumana direccion Airport; Trafico for di Airport direccion Oranjestad, ta wordo desvia via e caminda principal direccion Sta Cruz, despues via di e prome caminda na bo man robes (pariba di Cumana # 77)direccion noord, despues riba e caminda di Meiveld pasa patras di ex- Codemsa y sali na e rotonde di Tarabana. Trafico for di Sta. Cruz direccion Oranjestad, ta wordo desvia via e crusada di Morgenster na man drechi dirección caminda di Meiveld y eynan ta bira na man robes riba e caminda di Meiveld pasa patras di ex-Codemsa y sali na e rotonde di Tarabana.