OM: Caso Ibis trata pro forma na december 2017 posiblemente

ORANJESTAD - Caso Ibis lo wordo trata, segun expectativa, comienso di december 2017, pro forma pues 'un prome tratamiento' y no 'contenido'. Pa loke ta e prolongacion di e detencion di tanto e minister Paul Croes como su chauffeur awe mainta, a compronde awor, ta pasobra ta (mescos cu fiscal)  e Hues Comisario ta di opinion cu tin un sospecho fuerte cu Croes a haci su mes culpabel na hechonan castigabel serio: soborno ambtelijk (pasivo), verduistering, labamento di placa, falsificacion y traficacion di hende. Pa loke ta e chofer, tin e sospecho fuerte cu ela haci su mes culpabel hunto cu Croes di soborno (pasivo) y labamento di placa. 

KIA

Ambos sospechoso (e minister y su chauffeur) a wordo hiba bek KIA. Nan ta ainda den restriccion (beperking), loke kiermen cu nan no mag di tin contacto cu ningun hende, otro cu nan abogado. E investigacion lo sigui. E ekipo investigativo lo scucha mas testigo y sospechoso den e simannan nos dilanti. Un prome tratamiento (pro forma) den e investigacion lo tuma lugar inicio di december di 2017, segun expectativa di ministerio publico, segun vocero Ann Angela a bisa. 

PROLONGACION

Awe mainta den e caso di IBIS Hues Comisario den casonan penal di Corte den Prome Instancia di Aruba, a duna ordo pa prolonga/alarga e detencion di tanto e sospechosonan P.F.T. Croes y su chofer cu 60 dia, riba peticion di Fiscal di Husticia.