Marina real a reacciona riba video cu a bay viral na St Maarten

PHILLIPSBURG - Un video di un yiu di un trahado di Divi Resort na St Maarten a bay viral for di ayera, kehando severamente riba e operacion di marina real na e isla. E keho tabata cu marina real a drenta e hotel, saca tur hende for di e hotel, pa nan (marina real) na nan turno tuma e lugar over como lugar di hospedahe. Awe mainta marina real oficialmente a reacciona riba esaki. Mientras cu nan a admiti cu a haya oferta pa keda den e hotel, 'esaki no por conduci na sacamendo di hendenan for di e lugar, cu a perde tur cos. Esey ta netamente lo contrario pa cual nos ta na e sitio" e reaccion oficial a bisa. A compronde tambe cu e gerente di e hotel tambe a keda negativamente sorprendi. Ayera e trahadonan lo a tende cu nan lo wordo retira pasobra e hotel no por funciona mas. No tin awa, electricidad, y e cushina no por funciona y esey no tabata responsabel pa cu nan huespednan (cu t'ey ainda). Divi lo a saca un comunicado riba e tema.  

REACCION MARINA

Marina real a reacciona awe mainta, y bisa cu nan a haya mensahe berdad cu yen di famia a wordo saca for di Divi Resort debi cu marina mester a drenta e hotel y keda eynan awor. A confirma cu enberdad DIVI a ofrece pa ubica marina real den e hotel. Esaki marina real a aprecia masha, mirando e problema pa haya ubicacion riba e isla aworaki. 

 "Si a traha palabracion concreto cu e ubicacion di e militarnan no por conduci cu ta bay core cu e famianan cu ta eyden pasobra nan a perde tur cos". "Esey ta contrario di e meta pa cual nos ta na e sitio. Nos t'ey netamente pa sostene e comunidad y brinda ayudo" e comunicado ta sigui bisa. "Mando militar na St Maarten lo tuma contacto cu e gerencia di hotel pa haya claridad di e situacion".   Por mira e video cu a bay viral, AKI.