Discurso apertura aña parlamentario basa riba desaroyo sostenibel

ORANJESTAD - E discurso di Gobernador Alfonso Boekhoudt, (texto prepara pa gobierno di Aruba) na ocasion di e apertura di aña parlamentario 2017/2018 tabata basa grandemente riba e tema di 'desaroyo sostenibel'. E tabata e prome discurso di apertura di e Gobernador, manera cu el a recorda un y tur. A toca temanan manera e catastrofe na St Maarten, balansa den desaroyo sostenibel, enseñansa, presupuesto 2018, reapertura di refineria y mas. NoticiaCla a subraya cierto puntonan di e discurso di awemainta. Abou por lesa e discurso completo. 

SITUACION ST MAARTEN

Gobernador "Mi no por keda awemainta sin corda riba nos rumanan di Islanan Ariba cu a wordo azota horiblemente pa horcan Irma cu forzanan feroz destruyendo casnan, bidanan y tambe soñonan di hopi. Hechonan asina ta pone nos para keto riba nos vulnerabilidad como islanan chikito y e consecuencianan di cambio climatico pa nos. Pareu cu e forsa destructivo a surgi un forsa genuino di hermandad y convivencia. Irespecto di e distancia ayudo a y ta sali di tur skina di nos Reino pa brinda sosten y asistencia na e damnificadonan". 

DESAROYO SOSTENIBEL

E tema principal di e discurso, tabata desaroyo sostenibel. A enfoca e.o. riba e definicion di 17 area di Nacionan Uni pa garantisa un desaroyo duradero. Gobernador " E cambionan grandi y desaroyo acelera di Aruba den e ultimo decada ta haci cu Gobierno y Parlamento mester balansa awor mas y den forma mas concreto, e crecemento economico di nos pais, cu e cuido di medio ambiente y e deseo pa mehoracion social cu ta biba den comunidad. E balansa aki ta forma e base di un desaroyo sostenibel. Cu e fin aki, Nacionan Uni a defini 17 meta pa asina garantisa un desaroyo duradero y un prosperidad comparti. Gobierno di Aruba a compromete su mes completamente na realisacion di e Metanan di Desaroyo Sostenibel aki na Aruba".

ENSEÑANSA

E tema di enseñansa tambe a keda toca. A mustra riba continuacion di inversion den renobacion di scol, pero tambe plan pa adulto. Gobernador "Enseñansa ta e miho forma pa mehora bida di un persona y di un comunidad den forma duradero. Inversionan cu a y ta wordo hasi den enseñansa, sea cu ta den e infrastructura, den profesionalisacion di maestronan of den renobacion di e curriculo, ta inversionan pa generacionan nos dilanti. Mientras cu e plan pa inversionnan den renobacion di scol y den crea facilidadnan lo continua, lo intensiva e inversionnan den renobacion di nos sistema di enseñansa, cu e meta primordial pa aumenta significantemente e grado di exito di nos hoben y adultonan na tur nivel di enseñansa"

INDUSTRIA CREATIVO

Segun e discurso, gobierno di Aruba a identifica industrianan creativo, logistica, tecnologianan limpi y exportacion di conocemento como cuatro sector nobo, pa sigui promove crecemento economico unda tur hende por participa. Negoshinan chikito, empresarionan independiente, empresarionan nobo, como tambe startups, ta esencial pa haci e diversificacion economico aki posibel. Den e proceso aki lo haci uso activo di e caracteristicanan unico di nos isla, manera su accesibilidad aereo y maritimo, bon infrastructura, estado di derecho, proteccion di inversion, pa facilita y stimula e sectornan aki y contribui na e diversificacion genuino di nos economia. 

IDENTIFACION AREA PROTEHI

Mientras cu e siman aki ainda Aruba Birdlife Conservation a atende gobierno publicamente riba e tema, gobierno a atende esaki den e discurso. "Nos a identifica 16 area rond di nos isla cu ta rico den biodiversidad, flora y fauna como areanan protehi. Tambe e proceso den implementacion di nos Parke Marino ta den pleno ehecucion. Aruba a firma, den nomber di Reino Hulandes, e Acuerdo Climatico di Paris y ya caba a haci un peticion na Gobierno di Reino pa encamina e proceso pa e acuerdo aki tin valides pa e parti aki di Reino. Manera cu e metanan di desaroyo sostenibel ta prescirbi, nos tambe a tuma accion urgente pa contribui na combati e impactonan di cambio climatico. Den esaki Gobierno ta consciente cu maneho di naturalesa y medio ambiente ta esun di mas cardinal pa logra un desaroyo sostenibel. Esaki, sin embargo, ta rekeri esfuersonan combina entre Gobierno y sector priva pa por logra esaki". 

MANEHO HUBENTUD

Pa esnan mas vulnerabel den nos comunidad, Gobierno lo sigui pone atencion directo cu instrumentonan di maneho pa trece alivio y mehoracion riba termino cortico y cambio structural a largo plazo. Inversionnan den transferencianan social, den enseñansa y den condicionnan di biba, ta entre e accionnan concreto cu gobierno a y lo sigui tuma.

E maneho integral di hubentud cu gobierno di Aruba ta hiba a percura pa un coordinacion continuo entre tur instancia cu ta trata cu derechonan di mucha y hubentud. Esaki a resulta den miho bista riba bida y aspiracionnan di hobennan den nos comunidad y creacion di facilidadnan door di gobierno pa cumpli cu e necesidad di hobennan den areanan di enseñansa, economia, bida social, deporte y arte. Fondonan cu a aloca pa combati abuso di mucha a cuminsa duna resultado. Falta hopi pa haci pa eradica e abusonan aki. E prevension di abusonan aki ta keda e meta principal di e maneho.

INTEGRIDAD

Gobierno (den discurso presenta pa Gobernador di Aruba) a toca e tema tambe di integridad. "Gobierno y Parlamento tin e tarea pa busca - bou tur circumstancia - e miho solucion posibel pa tur reto di nos comunidad. E ta un tarea enorme y no tur ora facil. Pero e ta e tarea pa cua boso a wordo eligi. Dos principio cu semper boso mester considera ora di tuma desicion: esta sirbi e interes general hunto cu e resultado di e balansa entre continuidad, renobacion y preservacion di recursonan escaso, entre desaroyo economico y mehoracion di calidad di bida den e forma mas amplio posibel. Den esaki integridad di servicio publico mester keda manteni y cu e meta aki Parlamento a tuma e iniciativa pa codifica e normanan di integridad di nos gobernantenan. E principio di interes general ta rekeri pa scoge conscientemente y consistentemente pa loke ta bon pa henter nos comunidad enbes di loke ta cumbini algun a corto plazo of den futuro.

META DESAROYO SOSTENIBEL

Y finalmente, a cera cu e tema cu a cuminsa cu ne esta realisacion di e 17 Metanan di Desaroyo Sostenibel aki na Aruba. "E siguiente gabinete lo tin e tarea pa continua cu realisacion di e 17 Metanan di Desaroyo Sostenibel aki na Aruba y sigui traduci crecemento economico den bienestar pa tur esnan cu ta biba riba nos isla. Como representante di Su Mahestad Rey Willem-Alexander y como cabes di gobierno di Aruba, mi ta declara, manera nos Constitucion ta prescribi, e aña parlamentario 2017-2018 habri". Por lesa e discurso completo AKI.  Potretnan cortesia Telearuba.