Ralph Maduro a topa Speed Andrade dilanti mesa berde

ORANJESTAD - 'Un discusion entre periodistanan', manera cu un di e abogadonan a describi e situacion awe tardi, a termina dilanti mesa berde. E demandante (Ralph Maduro) a bisa cu awor cu e contra partido (24ora/Speed Andrade) a 'comete e fayo di menciona nomber y fam' tabata motibo pa awor si bay corte.  Maduro a hiba e portal 24ora.com corte pa motibo di un articulo cu a keda publica recientemente (16 di augustus 2017), alegando entre otro cu ex minister Otmar Oduber tabata su socio (di Maduro) y a privilegia su persona den varios ocasion durante cu Oduber tabata minister. Maduro a alega cu e acusacion ta sin base y ta causando su negoshi problema, a hiba e portal corte y exigi un rectificacion. E portal di su banda ta sigura cu e acusacion no tin base,cu ningun momento a haci acusacionan personal sino mas bien a expone un practica no corecto di gobierno y un compania priva. 

ARUBUS

E base principal di acusacion tabata rond di trabounan cu un di e companianan di Maduro, Alfa Printing ,-comercialmente conoci como Print Shop-, a haya  cu e compania di transporte Arubus pa e.o. print propaganda riba e busnan. Abogado di Maduro, -Rossie Marchena-,  a alega cu su cliente ta sufriendo cu e acusacionan infunda, asina perdiendo cliente. Como tal tabatin urgencia pa pone un paro na e practica aki di e portal. Si antes e (Maduro) no a reacciona, tabata pasobra antes e portal tabata publica cosnan 'wazig', riba e tema, esta no concreto pa cual no por a cuminsa ningun demanda. E biaha aki, e articulo na augustus ultimo a haci mencion di nomber y fam y a  duna Maduro e posibilidad pa bay corte. Marchena a sigura cu, contrario na loke e portal ta pretende, e atakenan tabata personalmente dirigi. Tur esaki mientras cu no por a produci ningun documento of prueba  pa substancia e alegacion di e 'union comercial' entre ex minister Otmar Oduber y Maduro. Un documento cu e partido acusa a usa como prueba ,segun abogado Marchena, ta parti di un documento incompleto (di 11 pagina) no firma cu no ta comproba e alegacionan haci. Segun Marchena, si a presenta e documentacion completo, por a nota cu tin mas compania cu ta cliente di Arubus, y cu nan ta gana mucho mas cu Maduro a gana (durante e periodo di 2013 pa 2016), y cu dificilmente por papia di 'enrikesemento di Maduro' door di e deal aki. "No por liga mi cliente cu sr Oduber" Marchena a sigui ripiti den corte. "Nan ta acusacionan directo, no tin prueba, y mi cliente ta desmenti tur cos. Ademas e contra partido ta bruha cos den otro. E acusacionan ta serio y ta causando problema pa mi cliente" Marchena a sigui bisa. A exigi rectificacion di e portal,  riba nan portada, y tin cu wordo cumpli den un periodo specifico. 

24ORA

E portal su defensa den corte tabata pa desmenti e denuncia di Maduro severamente. Abogado pa e partido, Glendeline "Lalo" Croes a mustra cu e articulo di dia 16 di augustus 2017 publica riba e portal en cuestion, tabata pa ilustra practicanan incorecto. Como 'watchdog', tabata necesario pa mustra comunidad di practicanan incorecto aki. Entre otro a indica cu riba documentonan di Arubus cu nan a pone man ariba, por a mira claramente cu e compania di Maduro tabata e 'post' mas halto di gastonan di promocion pa e compania. Ademas, e hecho cu su pareha tabata presidente di hunta di directiva di Arubus, tabata motibo suficiente pa Maduro tin acceso na informacionnan privilegia. "Tabatin e sospecho cu un di e hopi negoshinan di Maduro tabata wordo privilegia pa ex minister Oduber. Na ta bon amigo y tabata haci negoshi hunto". Ademas a trece e amistad entre casanan di Oduber y Maduro den e cuadro, pa mustra cu hunto nan tabatin te hasta negoshinan registra hunto. Y e hecho cu un di nan tabata ubica den edificio di suegra di Oduber, no a yuda e asunto. E hecho cu no a haci destaho pa e dealnan pa Arubus, ta cuestionabel segun e abogado. Sigur si ta trata di NV nan di gobierno manera ta e caso di Arubus. E loke cu clientenan di Croes a haci meramente, ta ilustra un practica incorecto y trece den noticia. A papia di 'conflicto serio di interes'. Ademas no a defama ningun hende, no a haci ningun atake personal, sino mas bien a mustra e 'modus operandi' di Maduro. Ademas, ta den cuadro di libertad di prensa y libertad di expresion a actua. A cataloga e asunto como (a considera Maduro den e caso aki tambe como periodista) dos periodista cu tin un discusion cu otro pa basta tempo (Nelson "Speed" Andrade di 24ora ) vs Ralph Maduro (pa su labornan como director di e emisora Power FM), cu a termina den corte. Huez a cera e caso y ta dicta sentencia diaranson dia 20 di september pa 8'or y mei di mainta, segun e rol regular di sentencia. Foto ta di comerciante Ralph Maduro yegando corte cu un amigo.