Bindraban: Premier Marlin y Hulanda a laga St Maarten na caya

WILLEMSTAD – “Premier William Marlin mester a pidi hopi mas ayudo. E y gobierno Hulandes a laga St Maarten na caya". Asina Mike Bindraban ta conta partner den noticia Caribisch Netwerk.   Bindraban ta un di e afortunadonan cu un buelo di Insel Air a wordo transporta di St Maarten pa Corsou diabierna. Segun e, tin anarchia total riba e isla. E tata di Bindraban ta malo, pues ora cu ela tende cu e por a bay Corsou cu su famia, ela sinti e como un milager. "Dianan largo bo mester ta fuerte y tene tur hende sigur. Mi por a yora ora cu cu realmente nos por a move". E sentimento ta dobel si, pasobra e sa con e situacion di e isla ta. "E no ta sinti bon contra esnan cu t'ey ainda, pero mi tata ta malo y mi tin un yiu cu tin cu wordo protehi. Riba esey bo ta pensa". 

DESESPERACION

Bindraban a crece na St Maarten, pero ta biba na Hulanda. E tabata di vacacion riba su isla natal, ora cu e horcan Irma a aparece. Nan a purba bandona e isla, pero tur buelo tabata yen. Pa por tabatin un lugar sigur, nan a mobilisa di un localidad banda di beach, pa un lugar mas paden. "Ora cu e wowo di horcan a pasa,  nos a bay pafo pa wak. E parti ariba di e apartamento no tabata t'ey mas; e dak a disparce, e contenido di e cas a bula bay. Hendenan desespera buscando nan famia. Mientrastanto biento a bolbe cuminsa supla: E di dos parti tabata na caminda y tabata mesun feroz". 

Despues di e tormenta, Bindraban a realisa cu tur cos a bay perdi: nan no por a bandona e isla y tabata simplemente 'pega'. "Mi casa tabata papia di e auto di huur, pero e compania no t'ey mas. No tin nada mas. Y con bo ta splica un mucha di 3 aña?"

DESTRUCCION

Bindranban a bula awe (diasabra) cu su famia bek pa Hulanda. "Ta tristo. 85 porciento di e isla ta destrui, infrastructura ta 100% destrui. Tin chaos, tin hortamento, na Simpson Bay Resort hende ta wordo secuestra, y polis mes ta ocupa cu nan propio asunto. Segun Bindraban, a mal calcula e horcan. "Premier Marlin a pidi apenas ayudo pa 40 militar y esey ta debi na honor. Y gobierno di Hulanda? Ministernan Plasterk, Koenders y Rutte mester por a prermira esaki". 

AYUDO

Segun Bindraban, mester tin ayudo extra mesora aworaki. "E pista di aterisahe ta limpi awor. Pues manda mas bapor, avion y ayudo". Como cu St Maarten ta un pais autonomo dentro di Reino Hulandes, gobierno mester ta esun pa pidi ayudo. "Pero tur cos ta plat. E premier no por ni localisa su propio ministernan. E ayudo ta necesario". 

Fuente: Caribisch Netwerk/Elisa Koek Foto Mike Bindraban