E ultimo grupo di pashent di St Maarten evacua exitosamente pa Aruba

ORANJESTAD - Cu un avion di marina Hulandes awe e ultimo 28 pashentnan di dialyse di St Maarten a yega Aruba. Entre nan tabatin 4 hende muher na estado. "Tur cos a bay hopi smooth" Director di departamento di Salud (DVG), Jerry Staring, a confirma pa NoticiaCla diasabra atardi. E ekipo di DVG y ekipo di desaster hunto cu e ekipo di aeropuerto a traha hunto, y percura pa tur cos cana bon. Cu ambulance a transporta e ultimo di 62 pashent pa nan respectivo lugar temporal di ayudo. E prome dos avionnan a yega diabierna anochi. Vocero di aeropuerto Hendrik Croes tambe a confirma e trabou di parti di aeropuerto. "E di tres evacuacion medico for di St Maarten tabata exitoso" Croes a bisa awe mainta. Pa loke ta buelonan pa y for di Miami cu ta cancela, Croes a recomenda tur hende check cu nan respectivo aeroliña. 

E PROME GRUPO

Manera cu e portal aki a raporta ayera caba, e prome grupo di por lo menos 35 pashent di dialyse a yega Aruba ayera nochi for di St Maarten, via Corsou. Inicialmente tabata papia di por lo menos 64 cu mester a yega hunto, pero e cantidad tabata menos. Hefe di DVG, Staring  a splica e portal aki ayera nochi cu tur hende a wordo gescreend y a haya triage door di team di dialyse hospitaal. Ambulance y gewonden vervoer a percura pa transporta un grupo pa Horacio Oduber Hospital y e otro pa Imsan.