Ricky Tromp: Pasada di horcan Irma tabata un experiencia bon feroz

PHILLIPSBURG - "E pasada di horcan Irma tabata un experiencia bon feroz" Asina miembro di Cruz Cora di Aruba Ricky Tromp a conta. Colega di prensa Dick Drayer a combersa cu ne na St Maarten riba su experiencia for di momento cu ela yega e isla dialuna, te cu awor. "Hopi dificil. Pero e tabata un experiencia. Nos a biba pa papia di dje" Tromp ta sigui bisa. E cu dos otro colega di Cruz Cora Aruba, Giomar Violenus y Dionisio "Fecito" Richardson a yega e isla for di dialuna anochi. Binti cuater ora despues nan a experencia e furia di e horcan cu tur su consecuencia. Awe nan ta mas trankil, y den un estado mental cu nan por cumpli cu e meta cu nan a bin cu ne, esta yuda esnan cu mester. 

E PASADA

Tromp ta conta con e pasada tabata un momento di hopi ansha y spanto. 'Basta feroz!". E ta conta tambe con diripiente unda cu nan tabata, e bentananan a rementa, cu a pone nan adrenalina subi y mobilisa den teamwork pa sigura cu no tin mas daño na e camber cu nan a tabata aden. "Den estilo di team work nos tabata move den grupo di 2, di porta pa benta , pa evita cu e resto tambe lo a kibra. E cansancio a bay den un rato di ora. E ora e adrenalina a 'kick in'," Tromp ta sigui conta. 

E TRABOU AWOR

E voluntario di Aruba ta conta cu awor nan ta mas trankil, y den un estado mental cu nan por traha y haci e trabou cu nan a bin pa haci. "Pa bo por duna asistencia, bo mes mester ta den un estado mental trankil. Nos ta trankil y cla pa yuda" Tromp a bisa. E momento ey e y su coleganan di Aruba y Corsou tabata na un shelter, en espera di orden pa yudansa. "Nos ta cla. Warda nos ta warda e orden yega pa nos actua" Tromp ta bisa. E ta consciente si cu mester di hopi mas ayudo pasobra loke tin aworaki no ta suficiente. 

MAS HORCAN

E siguiente sla ta bin e weekend aki. Tromp a bisa cu e no ta sigur pero ta kere cu e habitantenan ta na altura cu tin un otro horcan na caminda. "Pero mi no ta sigur". Segun Tromp, e comunicacion ta casi nada. E ta spera cu tur cos bay bon, y cu e sla di Jose, e siguiente horcan no ta bay haci mes hopi daño. E ta conciente cu e ta mas chikito, pero e hecho cu hopi hende porta no sa, por ta un problema. "Nos ta spera cu tur cos bay bon" Tromp ta bisa. Como Cruz Cora nan tin aceso na mas comunicacion, pero e sa tambe cu mester di mas comunicacion. "Nos mester di hopi mas ayudo. Hopi mas!" Tromp ta finalisa bisando. 

Texto NoticiaCla… Entrevista/fotos Dick Drayer na St Maarten