Encuesta Final: Grupo indeciso ta mas chikito awor!

ORANJESTAD - E grupo di persona cu no sa pa ken vota ainda, a bira considerablemente mas chikito. Esaki ta un di e resultadonan di e ultimo encuesta di NoticiaCla/Doc Opleidingen cu ta keda publica awe. Di e 1592 persona cu a participa na e encuesta, 1564 persona tabatin derecho di voto. For di cua districto tabata mas activo, cua debate tabata  mas popular, te na e partido cu ta goza di mas simpatia te cu awor (segun e encuesta aki), tur e resultadonan ta conoci den e encuesta ultimo aki. 

INDICACION

Esencial ta e indicacion cu e encuesta ta duna, ya cu e tabata un encuesta habri pa tur hende. E info demografico ta yuda den forma profil di esun cu a contribui, pero nos no ta pretende cu e encuesta ta representativo pa opinion di e votadornan di Aruba. Como informacion adicional, nos a wak si ta tin diferencia significante entre opinion di e Millenials y e 50 plussers (edad 50 y mas halto) 

DIFERENCIA

Por lo general, e diferencia tabata basta chikito, cu excepcion cu e Millennials a bay mas den direccion di e partidonan chikito/nobo RAIZ y RED, nan tin tiki mas preferencia pa un coalicion y poco menos preferencia pa e partidonan tradicional. Entre esnan di 50 aña y mas halto, nan ta bai mas den direccion di partidonan grandi, menos preferencia pa coalicion y menos pa e partidonan chiquito. Pa cu e topiconan di importancia, e diferencia ta minimal. Pa cu e grupo cu ta indica cu nan no sa kico nan lo vota, den e Millennials ta 20% cu ta indica cu nan ta ‘swing voters’ , mientras den e grupo 50+ e ta 11% swing voters. 

RESULTADO

Entre e resultadonan, 42.6% tabata sa caba pa cua partido nan vota for di momento cu e campaña a cuminsa. Esey kier men cu mas cu mitar (57.4%) no tabata sa ainda. Pa loke ta e debatenan, esun di millennials a score miho cu un 7.2, y esun mas abou tabata e debate pa Latino cu 2.9. Den periodo di campaña pa esnan cu a participa, e grupo cu ta vota specificamente pa e persona riba lista a score mas halto cu 4.4, mientras cu esun cu tin e programa di partido, tabata hopi cerca cu 4.3, sigui pa debatenan na 3.7. Den e seccion di e topiconan mas importante durante campaña, tabatin un empate entre e topico 'situacion financiero/debe nacional' y 'seguridad na Aruba' unda cu ambos a score un 3.8. 'Servicio medico' y 'educacion' tambe tabatin un empate na di dos lugar cu 3.7. Pa esnan cu sa caba pa ken nan lo vota y pa ken no, tambe tabatin informacion interesante. Partido MEP y AVP ta lidera esaki den e categoria cu sigur nan lo vota pa nan, mientras cu partidonan CURPA y MAS ta lidera den esnan cu ta bisa cu no tin ningun chens cu lo vota pa nan. Otro resultado interesante, ta e parti di cu ken mester forma coalicion. Aki esnan cu a resalta ta unda esnan cu ta vota MEP, ta prefera un coalicion cu POR, y pa partido POR, ta prefera forma cu MEP. Pa AVP, ta prefera traha cu MAS si mester forma coalicion. 

PARTIDO MAS POPULAR

E seccion mas popular atrobe, ta esun unda cu hende sa pa cua partido nan ta bay vota. Aki un biaha mas partido MEP ta tuma e liderazgo cu 41% di e cantidad, sigui pa 16% pa e grupo cu 'ainda no sa pa ken nan vota'. Despues ta sigui AVP cu 15%, y POR cu 10%. E tresnan cu ta mustra menos popular ta CURPA (0%), y MAS y UPP/PPA cu 1%. RED y RAIZ respectivamente tin 6 y 4%. Pero tambe tin e grupo cu ta 'otro', cu no kier bisa, ta na 5%. 

MAS INFORMACION

Den e encuesta aki, tabatin mas homber cu muher cu a participa. E cantidad di homber tabata 56% vs 44% cu tabata muher. E edad di mas cu a vota tabata entre 35-39 aña sigui pa 40-44 aña. Tambe esnan cu a participa, mayoria tabata na Noord (24.6%) y esun cu tabatin menos participacion, tabata atrobe San Nicolas cu 2.8%. 

GRADICIMENTO

NoticiaCla y Doc Opleidingen kier a gradici tur esnan cu a participa, y corda un y tur cu e informacion aki, mientras interesante, mester wordo usa responsablemente. Esta cu mester tene tur factor den consideracion. Wak e resultado completo AKI.