Trahado di examen bureau oficialmente bou di investigacion

ORANJESTAD – Un trahado di examen bureau ta oficialmente bou di investigacion segun vocero di ministerio publico a confirma na Bon Dia Aruba dialuna. Esaki ta loke e matutino ta raporta den su edicion di diamars. Ta trata di e persona cu lo ta envolvi cu tumamento di e toets di idioma pa un persona por haya su pasaporte hulandes. Pero e persona no ta deteni. 

“E investigacion ta cla y a wordo entrega na OM pa evaluacion. Fiscal tin ‘e riba su lessenaar y dentro di un tempo responsabel e lo bay dicidi si ta persigui ‘e of no y na ki manera, sea via Hues of den un TOM- zaak. Segun e matutino, sospecho riba un trahado di Examen bureau pa fraude cu examen di lenguahe den proceso di naturalizacion a causa pa Reino exigi pa tin un representante di gabinete di gobernador na cada examen. Esaki Minister di Educacion Michelle Hooyboer-Winklaar a duna di conoce na Bon Dia Aruba. Den curso di dia, NoticiaCla.com lo tin mas informacion riba e asunto aki.

Loke segun hopi ta complica e situacion, ta cu e persona envolvi ta primo di tanto un minister di gabinete Mike Eman II, y lider di partido politico den oposicion. Esaki pasobra e ta trece e asunto 'mas serca di cas'. Y den cuadro di esaki, NoticiaCla.com a busca e reaccion di e lider politico. Y den fin di siman cu a pasa, e lider di e partido MEP, Evelyn Wever a comenta riba e asunto delicado aki na NoticiaCla.com.  “Ta importante pa duna husticia espacio pa haci su trabou y determina kico precies e caso ta”. Reaccion di lider di partido di oposicion MEP Evelyn Wever na NoticiaCla.com riba e asunto di supuesto iregularidad den un asunto di naturalizacion, y mas specifico den asunto di toetsing pa por haya pasaporte hulandes. “Mi a tuma nota di algun informacion circulando den cierto medionan di comunicacion referente un investigacion di posibel iregularidadnan den e proceso di naturalizacion” Wever a sigui bisa.

E caso ta referi na hendenan cu lo a haci nan mes culpabel na supuesto manipulacion cu e testnan cu ciudadanonan stranhero tin cu pasa pa por haya nan pasaporte hulandes. E persona(nan) lo tabata ‘konkel’ cu e resultado cu ta pone cu hendenan toch ta pasa esaki y haya nan pasaporte. E problema ta cu tin acusacionnan cu a cay ligando miembronan di e partido y famia den e asunto. Y aki ta unda cu e lider a bin dilanti, pa aclarea un ke otro pa e medio aki, aunke e ta abstene di duna mucho mas informacion. E lider di e partido a opta pa no menciona nomber, ya cu e no a haye prudente pa haci tal.