Evelyn y Otmar ta desmenti deal cera entre MEP y POR

ORANJESTAD - No tabatin ningun 'lunch' entre lider di partido MEP Evelyn Croes y conocido comerciante Harry Koeman unda cu lo a discuti un supuesto deal entre MEP y partido POR. Asina e lider di e partido geel a sigura NoticiaCla diahuebs merdia. Lider di partido POR Otmar Oduber tambe a rechasa e ponencia ey na e portal aki. E lidernan politico ta reacciona riba declaracionan haci pa activista Jan de Ruijter como parti di un carta manda na PG van Dam, como denuncia contra un 'menasa contra su bida'.  

DE RUIYTER

E alegacion menciona ariba ta parti di un carta cu de Ruijter a manda e siman aki na direccion di PG Alexander van DAM, unda cu -manera indica caba- e ta haci denuncia contra e comerciante menciona, pa menasa di morto. Den e carta aki, de Ruijter ta bisa cu Koeman tabata gaba cu ela lunch a la grandi cu Wever Croes, Glenbert Croes y Dangui Oduber y cu lo a duna nan placa pa nan traha hunto cu partido POR. Koeman lo ta un di e financiadornan grandi di e partido POR segun e.o. de Ruyter.  Den un reaccion corto na e portal aki, lider di partido POR, Otmar Oduber a sigura e 'no tin niun deal in the making y tampoco POR tin financiadornan'. "Nos no ta un negoshi of compania" Oduber a sigui bisa. Ademas Oduber a comparti informacionan di corespondencia entre e cu de Ruijter di december aña pasa di un supuesto encuentro entre e dos personanan aki. 

CORESPONDENCIA 

Wever mientrastanto den su reaccion, a comparti un corespondencia entre su persona y de Ruijter, unda cu e ta contesta e activista basa riba su expresionan haci den e carta. "Mi ta lamenta cu bo a wordo menasa" Wever ta cuminsa na bisa e activista. "Mi no a lunch cu sr Koeman, y manera mi a bisabo mas biaha, MEP no tin ningun palabracion cu POR. Mi ta suplicabo pa no hincami den e 'affaire' aki. Mi no tin nada di haber cu e relacion entre abo y sr Koeman. Mi ta desea abo y bo famia forza" Wever a finalisa bisando. Den un reaccion na e portal aki, Dangui Oduber tambe a nenga di a reuni e siman aki cu Koeman. "Ami no a lunch ni topa Harry pa masha luna", Oduber a cuminsa na bisa e portal aki. "Y mucho menos haci algun afspraak pa cu POR of cualkier otro afspraak" Oduber a bisa. Glenbert Croes mientrastanto a reacciona riba su pagina di facebook tambe awe. "Mi a wak mi nomber ta circula cu mi persona of nos lo a lunch cu un comerciante. Categoricamente mi kier coregi esun cu mester wordo coregi paso ami no a lunch cu niun comerciante ayera y ni den e ultimo simannan o lunanan cu a pasa tampoco. Nos ta trahando duro pa saka mayoria absoluto 22 di September pasó ta intencion di MEP drenta Gobierno nos so cu e mandato di nos digno pueblo unda nos no lo depende di niun Partido pa forma e proximo Gobierno" e parlamentario di partido geel a bisa.