Horcan Irma a laga saldo di 10 morto na St Maarten

PHILLIPSBURG - Horcan Irma a laga por lo menos 10 morto na St Maarten, di cual 8 tabata riba e parti Frances y 2 riba e parti Hulandes. Asina defensa Hulandes ta raporta awe mainta. Tambe defensa Hulandes ta raporta di 23 herido riba e parti Frances. Destruccion total ta e forma con propietario di e corant The Daily Herald, Paul de Windt a raporta pa e.o. NOS. Aeropuerto y waf ta for di servicio, y e hospital ta parcialmente den operacion. E edificionan di gobierno tambe ta destrui y e punto di sosten di Kustwacht ta seriamente afecta. Via comunicacion militar, a logra establece algo di contacto, pero e forma regular di comunicacion no ta funcionando mas.  

AYUDO

For di e bapor militar Pelikaan, NoticiaCla a compronde cu nan ta yegando St Maarten despues di a sali for di Corsou diamars mainta. Pero nan no por mara na waf debi cu esaki ta parcialmente destrui. Nan lo uza botonan chikito pa e personal di marina por yega tera y cuminsa asisti. Fotonan cortesia di departamento di defensa di Hulanda.