Presidente management team di KIA a entrega su retiro

ORANJESTAD – Presidente di e management team di e instituto coreccional KIA, Fred Wijenberg a entrega su retiro dialuna na minister di husticia Arthur Dowers. Motibo no ta conoci exactamente aunke a compronde cu cos no ta bayendo mucho bon entre e persona menciona, y minister y demas miembronan di e management team. Mes momento NoticiaCla.com tin informacion cu e hefe di Personeel & Organisatie A.P. tambe a prohibi’e e entrada pa e facilidad. E motibo no ta conoci pa NoticiaCla.com. Mientras cu NoticiaCla.com tin e informacion aki confirma di 2 fuente, autoridad mes a opta pa no reacciona riba e informacion aki. Den curso di dia, NoticiaCla.com ta spera di tin mas informacion riba e asunto aki.

Mester bisa si cu minister di husticia recientemente a confirma na NoticiaCla.com cu e posicion di director den structura nobo, ta habri y lo cuminsa cu proceso di solicitud dentro di poco. No ta conoci si e proceso aki a cuminsa mientrastanto. Tabata na e occasion ey cu e informacion lo a sali cu e actual hefe di polis na St Maarten, Peter de Witte lo tabata postula pa bira e proximo hefe. Algo cu e mandatario di husticia a desmenti na NoticiaCla.com aunke den mesun rosea a bisa cu e ta un persona indica pa por solicita pa e funcion aki. Ora cu NoticiaCla.com a confronta de Witte cu e informacion aki e tempo ey, e la mustra cu e no a wordo acerca y cu e ta den proceso pa keda cla cu su funcion como hefe di polis na St Maarten.