Dañonan structural cuantioso na St Maarten parti Hulandes y Frances

PHILLIPSBURG - E prome raportahenan di St Maarten ta drentando, y for di e ekiponan di reskate, NoticiaCla a compronde cu e isla 'no ta alcansabel'. E daño structural riba e parti Frances ta mas grandi cu esun Hulandes, aunke no mucho. Y tin ya caba informacion di e prome victimanan di e horcan. Algun ta familiarnan di esnan na Aruba. A compronde cu e parti di defensa Hulandes ta tumando liderazgo, y lo haci nan prome buelo di exploracion cu helicopter awe nochi pa por identifica lugarnan pa aterisa. E aeropuerto ta pa un gran parti destrui y no operacional, ya cu e pista entre otro ta seriamente destrui, e edificio tambe y e pista ta inunda cu awa, piedra y santo. Na e parti Frances, e toren di control a wordo ranca y tira riba e pista di aterisahe. Ta kere cu lo dura algun siman prome cu e pista ta operacional atrobe. 

WAF

E terminal crucero y piernan na e waf ta totalmente destrui. Defensa Hulandes a informa cu por lo pronto no tin trafico aereo comercial. Defensa Hulandes lo traha un asina yama 'luchtbrug' entre Corsou y St Maarten asina cu logra haci e pista di aterisahe 'operacional' atrobe.  Tin por lo menos 10 shelter di cual 5 ta operacional, y ta trahando aworaki pa prepara e otronan, cu bista riba e horcan nobo Jose, cu ta pronostica pa yega St Maarten diasabra of diadomingo awor.