Gobierno Hulandes ta convivi cu esnan afecta pa Irma

DEN HAAG - 'E prome noticia y imagenan teribel di e parti caribense di nos Reino'. Asina prome minister Hulandes Mark Rutte a reacciona riba e desaster cu horcan Irma a laga atras awe riba Isla Riba. E mandatario ta bisa cu ainda no ta mucho conoci con grandi e daño exacto ta cu Irma a causa, pero cu Sint Maarten, Saba y Sint-Eustatius a keda seriamente afecta lamentablemente ta sigur. "Hulanda ta cla pa yuda unda cu mester. Asina cu ta posibel, dos bapor di marina for di Aruba y Corsou, lo aporta cu marinier y material, hunto cu e 100 militarnan cu ta na St Maarten caba" Rutte a sigui bisa.  Gabinete Hulandes, te asina cu ta posibel, ta den contacto cu autoridad local y ta sigui e desaroyo di cerca. "Ami, pero tambe e otro miembronan di gabinete ta convivi cu tur ciudadano di e islanan afecta. Mi ta desea tur hende cu a keda afecta pa e desaster natural aki, hopi forsa den e ora y dianan cu ta sigui" e mandatario a finalisa bisando.