Hulanda evaluando pa tuma medida contra Venezuela

DEN HAAG - Gobierno Hulandes no ta descarta pa tuma medida contra gobierno di Venezuela, incluyendo sancionnan dirigi, contal cu nan tin efecto. Asina ministernan Ronald Plasterk y Bert Koenders a informa Tweede Kamer dialuna den un carta di 6 pagina. E sancionan mester tin efecto, no perhudica e pueblo Venezolano, y ta wordo anuncia den cuadro cu Union Europeo. "Hulanda lo coincidi esaki cu Aruba, Corsou y St Maarten pa tene e interesnan di Reino na cuenta". Esaki pasobra sancionnan por tin consecuencia cu e islanan di Caribe Hulandes debi na e relacionan economico cu tin entre e islanan y Venezuela. Sinembargo mes momento ta bisa tambe cu no tin motibo aworaki pa tuma medida extra pa seguridad di e islanan. 

EXODUS VENEZOLANO

Gabinete Hulandes un biaha mas a sigura cu nan ta sigui e desaroyo na Venezuela hopi di cerca. " No obstante e hecho cu tin hopi noticia den medionan di intercepcion di illegalnan (mayoria Venezolano), no tin indicacion cu ta mustra riba un influx masal di Venezolanonan pa e islanan di Caribe Hulandes". Ta mira cu mayoria di e exodus ta sosode via paisnan bisiña via manera terestre y no cruzando laman. Esey no ta kita afo cu ultimo cifranan di Warda Costa di Caribe, pa 2017 ya tin 245 ilegal intercepta (mayoria Venezolano), di cual 220 ta na Corsou, 22 na Aruba y 3 na St Maarten. A afirma cu a intensifica e patruyahe di Warda Costa. 

HULANDESNAN NA VENEZUELA

E situacion social cu a empeora na Venezuela tambe tin influencia riba e mas of menos 1500 Hulandesnan cu ta biba na e pais latino. Un parti di esnan cu ta carga e pasaporte Hulandes, tin su raiz den e parti Caribense di Reino.  Segun gabinete di Hulanda, aunke cu e embahada Hulandes tabata hopi activo den nan peticion na e Hulandesnan pa registra cu e servicio 24/7 consular di informacion, apenas 132 Hulandes (45 famia) a registra. Tin un plan di evacuacion pa e Hulandesnan aki, pero no tabatin indicacion cu ta nifica cu mester activa e plan di evacuacion aki aworaki segun e dos mandatarionan. Sinembargo, e departamentonan concerni ta preparando si pa un eventual evacuacion. Parti di esey tabata e adaptacion di e conseho di biahe (reisadvies) cu a tuma lugar dia 8 di augustus ultimo. Foto cortesia www.nu.nl .