Medida disciplinario contra trahado deteni di ministerio di husticia

ORANJESTAD- Mientras cu ministerio di husticia a confirma dialuna atardi cu un di su trahadonan ta deteni, ta desmenti mes momento si cu detencion tin di haber cu malversacion den e ministerio mes. E detencion tin di haber cu malversacion den departamento di enseñansa, manera ta conoci caba. Un comunicado cu e ministerio a publica, ta menciona tambe cu ‘ tur medida disciplinario al respecto a wordo tuma y ta laga e caso den man di Ministerio Publico’.

E ministerio di husticia a tuma nota di informacionnan circulando den medionan di comunicacion referente e investigacion aki y ta lamenta cu un medio di comunicacion kier crea impresion eroneo cu e detencion aki lo tin algo di haber cu malversacion den ministerio di husticia. “Ta lamenta cu ta purba mal informa nos comunidad” e comunicado ta sigui bisa.