Presupuesto 2018 di ATA entrega na Minister di Turismo

ORANJESTAD – Aruba Tourism Authority (A.T.A.) a entrega nan presupuesto 2018 na Minister di Turismo Mike de Meza dialuna. Conforme ley A.TA. tin cu entrega su presupuesto y plannan no mas tarda cu 1er di september na Hunta di Supervision. E aña aki a entrega esaki 4 di augustus na Hunta di Supervision, asina agilisando e proceso y di aprobacion cu ta asina importante pa A.T.A. y inversionnan turistico cu mester tuma luga. De Meza a expresa di ta satisfecho cu entrega y contenido di e documento y lo continua di su banda cu e proceso di revision/aprobacion.

PROYECCIONNAN 2018

Pa loke ta e 4 indicadornan principal nacional; pa 2018 a inclui como proyeccion un crecemento di 3.7% den ‘stay-over arrivals’ (turistanan di estadia). Un cremento di entre 2% y 3.5% den Tourism Receipts. Un resultado di 0.8% pa cu Revenue per Available Room (RevPar), segun AHATA y teniendo na cuenta cu un cantidad di camber di hotel lo ta for di circulacion otro aña, conforme plannan di renovacion di camber. Pa cu turismo crucero ta proyecta pa crece cu un minimo di 7% den cantidad di bishitante crucero.

PROYECCIONNAN 2017 ‘CON LO CERA AÑA?’

Pa cu 2017 ta proyecta cu ‘stay-over arrivals’ lo cera aña cu un bahada di 6.6% incluyendo Venezuela y cu un subida di 5.9% excluyendo Venezuela. Tur continente ta proyecta di cera cu un crecemento (pa LATAM un crecemento ora exclui Venezuela). Pa cu Tourism Receipts te cu prome cuartal di 2017 esaki a crece cu 3.5%, A.T.A. ta sigui mantene proyeccion segun Banco Central di +1% pa 2017. E RevPar te cu juli ta mustra crecemento mas fuerte den Caribe cu un crecemento di 12.3%. Conforme proyeccion di AHATA lo cera 2017 cu un crecemento den RevPar di 8.6%. Turismo crucero a mustra crecemento di 18.2% te cu juli 2017 y ta proyecta cu lo cera aña cu un crecemento di 16%. Ambos 2017 y 2018 lo mira crecemento fuerte den mas bien temporada abou di turismo crucero, mientras cu temporada halto ta keda stabil. Tur di e 4 indicadornan clave ta proyecta di surpasa metanan stipula pa 2017, cu excepcion di ‘stay-over arrivals’ ora inclui Venezuela. Por nota cu e impacto di esaki riba ambos e Tourism Receipts y RevPar ta mitiga significante pa medio di entre otro desaroyo fuerte di Merca y e continente di Norte, Sur America y Europa.

PRESUPUESTO 2018

Conforme presupuesto presenta pa 2018, 71.4% di A.T.A. su entrada operacional (revenues) ta proyecta na mercadeo y promocion, 7.2% na desaroyo di nos destino, 1.2% na e fondo di Aruba Hospitality and Security Foundation y 16.7% na gastonan operacional.