Mariniernan di Aruba rumbo pa St Maarten pa horcan Irma

ORANJESTAD – Un total di 90 marinier di Aruba y Corsou awe nochi ta na caminda pa St Maarten pa asina sostene autoridad local cu yegada y pasada di horcan Irma. Comandante di Marinierskazerne Timon van Dishoeck prome cu su salida pa St Maarten awe tardi a confirma na NoticiaCla cu di Aruba tin por lo menos 12 persona di Arumil ta bay, y e resto ta mariniernan Hulandes. Cuanto exacto di Aruba (di e 90 entre Aruba y Corsou) ta bayendo, e no por a bisa e portal aki. Mientrastanto vocero di marina stationa na Corsou, Canan Babayigit a splica NoticiaCla cu e trabou lo encera e.o. preparacion prome cu e horcan yega, durante e pasada, y despues di e pasada primordialmente cu establecimento di e.o. e shelters. Tambe nan trabou ta pa yuda inventorisa e daño cu Irma laga atras. Ademas segun Babayigit, Marina Hulandes a pone dos bapor di marina den e area pa ayudo . Entre nan Zr Ms Zeeland awe nochi ainda tabata wordo carga cu material y personal, y ta programa pa bandona Aruba mayan, rumbo pa St Maarten. Fuera di esey, Zr Ms Pelikaan ta haciendo mescos pero na Corsou, y ta sali mayan tambe rumbo St Maarten. E horcan ta pronostica pa yega den cercania di e isla diamars anochi.