Rainbow Warriors International ta aproba y sostene EcoGas

ORANJESTAD - E organisacion Rainbow Warriors International, ta aproba y sostene EcoGas. Asina nan ta informa pa medio di un comunicado. Nan ta un organisacion internacional dedica na desaroyo sostenibel, cu sede legal na Aruba, Reino Holandes, y acredita na Naciones Uni atraves di e UN ECOSOC Civil Society Network y ta registra den e Yearbook of International Organizations di e Union of International Organizations desde 1999. Segun e organisacion, aña pasa, riba peticion di Fundacion Parkietenbos na Aruba, nan a produci un rapport, titula 

"VOORSTELLEN VOOR EEN BELEID VOOR AFVALBEHEER EN -VERWERKING OP ARUBA EN DAARMEE SAMENHANGENDE SCENARIOS VOOR DE VUILNISSTORT TE PARKIETENBOS. Afgestemd op het beleid voor duurzame ontwikkeling conform de 2014 Samoa Pathway for Sustainable Development for SIDS en de doelstellingen en doelen van de 2030 Agenda for Sustainable Development der Verenigde Naties". 

Como parti di e proceso aki, nan a acepta invitacion di e gerente di e planta di EcoGas pa visita e instalacionan na Barcadera y a discuti den mas detaye e operacionan y e contribucion di e planta aki pa yega na un sistema nacional structura pa maneho di desperdicio na Aruba. 

Den e visita di e planta nan (Rainbow Warriors) a ser mustra e sala na unda truck di sushi ta yega pa descarga desperdicio di cas y negoshi den e preparacion pa ser procesa den e instalacionan di separacion di desperdicio, cual ta separa desperdicio no utilizabel y e materialnan reciclabel pa finalmente produci un materia prima (Refuse Derived Fuel, RDF) cu a ser separa di e desperdicio original, for di cual extraccion di un 13% di volumen na material manera metalnan ferroso y no ferroso, santo, piedra, sushi organico y glas a tuma lugar. 

E RDF aki sea por ser procesa den e unidad di gasificacion pa suministra gas of manda esaki pa un unidad di embalahe cu ta yena saco grandi cu e RDF den forma di EnviroBales cual por ser hiba pa dera den landfill, manera tambe ta ser haci na Merca. Atraves di Envirobaling areanan yena bek por ser recupera y desaroya sea como area di recreo of den forma di parke di energia solar of molina di biento pa genera energia electrico. 

E alternativa pa Envirobaling ta pa exporta pa fabrica di cemento den nos region, pero e tarifanan actual di transporte maritimo y tarifanan hopi abao pa procesamento di desperdicio ta haci cu exportacion no ta un opcion comercialmente viabel. 

Rainbow Warriors International a ricibi un splicacion detaya di e procesonan envolvi y a keda impresiona pa e hecho cu e planta na Barcadera ta procesa aproximadamente 30% di tur desperdicio di cas y di negoshi na Aruba, cu un amplio capacidad pa procesa e 70% restante, den un forma cu ta elimina e necesidad pa un dump den aire liber na unda ta deposita desperdicio no separa, ya cu ta deshaci di desperdicio procesa den forma di EnviroBales, cu ta no toxico y reusabel, den e mas di 40 buraco grandi crea dor di extraccion di santo y grijs rond Aruba, cu ta forma un peliger, ta un perdida di espacio utilisabel y cual lo no ser yena den ningun otro forma. 

E NGO ta sigui splica cu e planta di EcoGas a ser adopta pa Gobierno di Aruba y Prome Ministro Mike Eman, como parti clave y solucion ehemplar pa e programa ambicioso di Green Aruba y e Vision 2020 pa Energia Renovabel na Aruba y a firma un contracto cu WEB Aruba NV pa suministro di gas pa un unidad di gas pa produccion di energia electrico, reduciendo asina e necesidad pa combustibel importa pa generacion di energia electrico den e planta di WEB Aruba. E planta di EcoGas, segun Rainbow Warriors, ainda no ta suministra gas na WEB Aruba, y tin negociacion pendiente pa entrega. 

Rainbow Warriors International ta aproba y apoya e planta di procesamento di desperdicio y gasificacion na Barcadera como un valioso contribucion pa yega na un sistema nacional di maneho di desperdicio, cu ta cumpli cu e Obhetivonan di Desaroyo Sostenibel di Naciones Uni (SDGs) y e 2014 Samoa Pathway for Sustainable Development for SIDS. Pasobra e planta por elimina e necesidad pa deposita y kima den aire liber desperdicio no separa, nos ta urgi comunidad y Gobierno di Aruba pa duna sosten na Ecogas den su esfuerzo pa maneha desperdicio den un forma bon organisa, na unda e dos metodo di procesamento Envirobaling y gasificacion mester coexisti pa asegura un solucion continuo y sostenibel. 

Di lo contrario, e miyones di florin inverti pa un compania local lo por ser considera placa tira afor, y no solamente nos ta perde tereno gana pa yega na un sistema nacional pa maneho di desperdicio pa Aruba di acuerdo cu directivo (guidelines) di Naciones Uni, sino tambe nos ta perde cara den e comunidad internacional na cual e planta di EcoGas a ser presenta como un instalacion pa procesamento di desperdicio y gasificacion di vanguardia. Y ironicamente, tambe nan lo bolbe na e practica di deposita y kima desperdicio no separa den aire liber na Parkietenbos, un practica cu Gobierno di Aruba enfaticamente na varios ocasion a anuncia cu lo ser termina lo mas pronto posibel.