CAft y gobierno cu diferente opinion riba cumplimento norma 2017

ORANJESTAD - Colegio di supervision financiero CAft tin duda cu gobierno lo logra  e norma di 0.5% di e deficit pa fin di aña. Asina e ta cuminsa su comentario di e raportahe di di dos cuartal di finansa di Aruba pa 2017. Cu algun punto positivo den e rapport, manera paro di personal obligatorio, y e parti di pronostico di saldo financiero (Schuldquota) añadi den e rapport aki, e resultado positivo di e resto di entidadnan dentro di e sector colectivo pa e prome mitar di aña, CAft ta keda sceptico cu e resultado. Su preocupacion grandi ta sigui cu e parti di e reapertura di refineria, falta den coleccion pa BBO y impuesto salarial. Gobierno di su banda mientrastanto, den un reaccion den nan comunicado, ta positivo riba e pronostico, y contrario na CAft su pensamento, ta kere cu nan si lo logra e meta di 0.5% di e deficit como norma. Te hasta ta elogia e hecho cu nan a yega 0.7% pa mitar di e aña aki caba. 

ATRASO

BBO Y impuesto salarial ta keda un problema segun CAft. Sigur pa loke ta e forma y e cantidad cu e mester a genera aworaki. "Nan ta canando atras segun e schema" CAft ta bisa. Gobierno den pasado sinembargo a culpa CAft di ta extrapola e cifranan continuo y cu cada bes tin e mesun storia. Nan a bisa den pasado caba cu CAft sa masha bon cu cierto entrada ta bin den cierto temporada, pero CAft ta sigui insisti cu cos ta malo. 

REFINERIA

E reapertura di e refineria ta sigui ta un problema pa CAft. Entre e problemanan menciona, ta papia di un entrada presupuesta di 54 miyon florin cu mester a drenta den dos termino. Sinembargo ta un termino so a logra te ainda (2016), pero nada ainda pa 2017. Ademas, e huur anual di 6 miyon ainda no a wordo ricibi. Di otro banda mester compronde cu nos ta apenas na mitar aña y como tal e no por wordo paga ainda. Tambe CAft ta mustra cu e 40 miyon cu gobierno mester a ricibi di e refineria, ainda no a wordo traspasa. Gobierno den pasado a sigura e portal aki cu e placa ey ta sigura y cu nan lo ricibi e placa. Cu nan no a ricibi'e ainda, ta un pregunta cu no tin contesta ainda. NOTA: Foto di archivo cu e ultimo conferencia di prensa di CAft cu Age Bakker como presidente.