St Maarten ta confirma sospecho di prome caso di baby cu microcephaly

PHILIPSBURG:--- Minister Emil Lee di salud a confirma e siman aki cu un baby a nace na St Maarten cu e simptoma relaciona cu microcephaly. Asina e portal Daily Herald di St Maarten a raporta. Segun e portal, e mandatario no tabata mucho contento cu e forma con prensa a raporta esaki, alegando cu ta trata di un caso di privacidad di e famia cu a haya nan mes den un situacion fastioso. Lee a bisa tambe cu e mama cu a duna luz, no ta un residente di St Maarten y como tal ta sinti cu e isla a 'scapa' di un problema. Con esey ta un asunto cu a 'scapa', e portal no ta bisa.  

MICROCEPHALY 

Microcephaly ta un defecto di nacemento ora cu un baby su cabes ta mas chikito cu normal. Nan tin cerebro tamne mas chikito, cu ta menos desaroya.  Mientras cu e motibo di e defecto aki ta desconoci, tin informacion cu ta liga esaki cu e virus di Zika, y cu ora un dama na estado keda infecta pa e virus aki, e chens ta grandi cu e baby por nace cu e defecto aki.