Gregory Damoen miembro nobo di Cft di Corsou y Sint Maarten

WILLEMSTAD – Dia 1e di september Conseho di Minister di Reino a nombra Señor Gregory Damoen como miembro di Colegio di supervision financiero di Corsou y Sint Maarten na nomber di Corsou. Cu esaki Señor Damoen ta sigui Señor Alberto Romero, kende su plaso di nombramento a termina dia 1e di februari 2017.

Riba recomendacion di Minister Presidente di Corsou y di acuerdo cu Conseho di Minister, Conseho di Minister di Reino a dicidi di nombra Señor Gregory Damoen entrante dia 1e di september 2017 miembro nobo di Colegio pa Corsou. E nombramento ta pa un periodo di tres aña cu e posibilidad di prolongacion pa un solo biaha di tres aña mas. Señor Damoen ta Director adhunto di Risk & Compliance na Banco Central di Corsou y Sint Maarten, y previo na su carera na Banco Central el a traha entre otro como Director di Finansa na Gobierno di ex-Antia Hulandes. Gregory Damoen tin un master den accountancy. Banda di esey e ta miembro di Conseho Consultativo di Corsou; di e funcion secundario aki e mester tuma retiro inmediatamente.

E ta sigui Señor Romero, kende for di dia cu a institui Cft tabata miembro di Colegio. Despues di tabata dies aña miembro di Cft na nomber di respectivamente ex-Antia Hulandes y despues Corsou, Señor Romero ta transferi su posicion na Señor Damoen.

Presidente di Cft prof. dr. Raymond Gradus ta contento cu door di drentamento den funcion di Señor Damoen Colegio di supervision financiero di Corsou y Sint Maarten ta completo atrobe. Na nomber di Hulanda Señora Sybilla Dekker ta forma parti di e Colegio aki y na nomber di Sint Maarten Señora Maria Plantz. Na nomber di tur miembro di Colegio e ta duna Señor Damoen un cordial bonbini den Cft y e ta spera un bon colaboracion.