Pasadia Briyo di Solo no ta pasando den su miho momentonan

ORANJESTAD - Pasadia Briyo di Solo no ta pasando den su miho momentonan. Despues di un candela recien cu a laga por lo menos 3 locaal for di servicio 3 siman pasa, e fundacion ta haciendo tur lo posibel pa keda cla mas liher posibel pa por tin e facilidad completo den operacion atrobe. Ta rekeri por lo menos 100 mil florin pa ekipa e parti cu a kima, segun tesorero Reinta Schutter a bisa durante di un conferencia di prensa. Y esey ta los di e reparacion na e edificio cu tambe mester di fondo. Mientrastanto mama di un cliente di e facilidad, Saskia Curiel no ta nada contento cu e forma con e situacion ta wordo atendi. Cu un yiu 'grandi' special sin un lugar pa bay, e situacion pa Curiel ta uno hopi fastioso. 

PLACA

E fundacion ta den tramite pa keda cla cu e.o. seguro, bombero, y tur otro instancia cu mester tey pa por haya un bista cuanto placa mester pa por drecha loke a keda daña. Segun Tambe un team di persona a subi caya pa pidi donacion pa e fundacion. Directora di e fundacion Els van Homelen a splica cu ta trahando cu contratistanan pa haya oferta, pero tin tambe asunto di regla cu seguro, pa sa cuanto placa ta haya bek aworaki. Problema segun van Homelen, ta cu seguro ta paga solamente e daño y no un edificio nobo. Mescos cu e situacion di un auto cu haya su mes den un accidente. E posibilidad pa tin trailer temporal tambe ta un opcion aunke cu e ofertanan ta mara na condicionan cu dificilmente e fundacion por cumpli cu ne of atende cu ne. Pero ta trahando pa logra keda cla mas liher pa asina e clientenan diario haya un lugar bek liher pa por 'pasa dia'. 

KEHO

Mama di e cliente Rosita Jack, esta Saskia Curiel no tabata mucho positivo riba e situacion. Splicando su situacion personal, Curiel a mustra cu sin un lugar pa hiba su yiu actualmente, ta dificulta su propio operacion den siman. A splica cu debi cu e no por hiba su yiu na e centro, e mester a corta su dianan di trabou na 4 pa siman, pasobra esey ta e unico dianan cu su famia por keda wak pa su yiu. E otro dianan e mes mester 'take care' di su yiu, cu ta nifica cu e no por traha e ora, cu ta nifica menos entrada fin di luna pa e y su yiu. E no ta compronde con den 3 siman, no por a keda cla cu tur e tramitenan y cu ta durando hopi largo pa keda cla. Pa politiconan tambe no tabatin bon palabra. A haci mencion di varios politico actual cu a pasa na su cas pa busca voto, pero cu a resulta den promesa bashi. Na tur, Curiel ta mustra cu nos isla no ta cla pa atende cu casonan di hendenan special, y cu Aruba ta kedando atras den esaki ya cu ta parce cu esaki no ta un prioridad pa Aruba.